HORCAN MILTON

ORANJESTAD – E efectonan di Horcan Milton ya ta afectando partinan di estado di Florida na Merca cu yobida y biento fuerte.

Durante di e siguiente oranan, National Hurricane Center ta anticipa cu e situacion lo empeora ainda mas y ta pronostica cu pa diaranson horcan Milton por   lo causa daño catastrofico na Central Florida.

Un peticion urgente ta bay pa tur persona di nacionalidad Hulandes y residentenan di Aruba, cu ta encontra nan mes na Florida, pa nan sigui e noticianan local y sigui instruccion di e autoridadnan di Floridaestrictamente.

Consehonan importante:

• Sigui instruccion di autoridadnan local: tur condado tin plannan di emergencia y refugio pa evacuacionnan obligatorio.
• Riesgo di ola di tormenta: e costa west di Florida ta enfrenta y lo keda un riesgo halto di ola di tormenta. Evacuacionnan ya caba ta tumando lugar.
• Biento explosivamente fuerte y interrupcion di coriente: E impacto mas grandi na entre otro Tampa y Orlando ta biento hopi fuerte y posibel interupcion di coriente.

Registracion y numbernan di emergencia:

Ta confia cu tur individuo tuma e medidanan necesario pa nan por keda safe durante di e pasada di e horcan Milton. Reino Hulandes ta conseha esnan di nacionalidad Hulandes cu ta encontra nan mes na Florida den caso di emergencia pa inscribi nan mes via di e Servicio di Informacion di Asuntonan Exterior www.nederlandwereldwijd.nl.

Den caso di emergencia por tuma contacto cu embahada Hulandes 24 ora pa dia, 7 dia pa siman via e centro di contacto di Nederland Wereldwijd via e number di telefon: +31 247 247 247 of via WhatsApp: +31 6 82 38 77 96.

Pa mas informacion tocante kico por haci den un situacion di crisis por bishita e siguiente link: https://www.netherlandsworldwide.nl/crisis/what-to-do-crisis