Hoofdstembureau Aruba ta informa cu tin oportunidad pa aplica pa traha na urnanan electoral
ORANJESTAD - Dia 6 di december 2024 Aruba lo bay eligi su miembronan di Parlamento. Pa e motibo aki, Hoofdstembureau ta informa cu lo cuminsa tuma nomber di e personanan interesa di sinta como miembro na e urnanan electoral riba e dia di eleccion.
Conforme articulo 37 di nos Ordenansa Electoral e miembro di urna mester ta un persona cu tin derecho di voto, esey kier men:
- Cu e mester tin nacionalidad Hulandes
- mester ta registra na Registro Civil y Censo prome cu 18 di september 2024
- y dia di eleccion tin 18 aña bay ariba.
Pa e presidente y presidente suplente di e urna nos ta invita personanan den enseñansa, otro profesionalnan, of personanan cu experiencia amplio den e funcion aki.
Esnan interesa por manda un e-mail na afspraken@censo.aw cu e siguiente informacion:
- Nomber(nan) y fam;
- fecha di nacemento;
- y menciona e urna, si den pasado bo persona a yega di traha na un urna caba.
Lo notifica tur persona, cu a aplica y ta acepta, na tempo y por escrito di nan aceptacion.