Historia di Statuut

Segundo Guera Mundial a percura pa un otro bista riba funcionamento di Reino Hulandes y colonialism. Na 1939 Surnam y e 'Parti di e teritorio Corsou' (desde 1948 oficialmente 'Antias Hulandes') tabata den e tempo ey e unico partinan di ‘Hulanda’ cu no tabata ocupa. Notabel tabata ta cu mas cu mita di fuel pa avion pa e aliadonan tabata bini di e refinerianan di Corsou y Aruba. Reina Wilhelmina a anuncia via Radio Oranje ya caba na 1942 mas independencia pa e teritorionan na e otro banda di lama. Pa India-Hulandes esaki no a resulta suficiente. Na 1945 nan a proclama nan independencia unilateral. Porfin na 1949 Hulanda a traspasa e soberania pa e Republica di Indonesia.

1948

Mientrastanto na 1948 a cuminsa negociacion cu Surnam y Antias Hulandes. E ‘Statuut pa Reino Hulandes’ o sea Statuut a keda finalisa na 1954.

1954

Reina Juliana a anuncia e Statuut durante un ceremonia riba 15 di december 1954 den Ridderzaal y esey ta e motibo pakico nos ta celebra dia di Reino Hulandes o sea dia di Statuut tur aña riba 15 di december. E punto di salida di statuut tabata e igualdad entre Hulanda, Surnam y Antias Hulandes (no Guinea-Nobo Hulandes). E teritorionan Guinea-Nobo Hulandes, Surnam y Antias Hulandes a haya pa gran parti nan mesun gobernacion pa asunto local. Hunto ta dicidi riba asunto comun di Reino. E statuut a keda existi tambe despues cu a traspasa Guinea-Nobo pa Indonesia.

1975

E prome cambio den statuut a sosode na 1975. Kabinet-Den Uyl tabata na mando y a dicidi cu "bon mira, no ta aceptabel mas pa un pais tin colonia". Entrante 1975 Hulanda y Antias Hulandes a bira pais autonomo den Reino. Guinea-Nobo ya a sali for di Reino y Surnam lo bira completamente independiente (ricibiendo un suma di 3,5 miljard florin hulandes). Antias Hulandes lo keda cu su gobernador, representando e rey. Tur pais a haya totalmente nan mesun gobierno y tur pais cu excepcion di Hulanda ta manda un minister plenipotenciario Hulanda pa representa nan gobierno den e reunionan na unda ta trata asunto di Reino (cambio di Statuut, Ley Fundamental cu ta toca asunto di Reino y ley di Reino(rijkswetten).

1985

E siguiente cambio a sosode na 1985. Aruba kier a habri su halanan y bandona e neishi. Aruba a haya su "Status aparte", como areglo di transicion, el a bira un pais aparte dentro di Reino. Statuut ta valido atrobe pa tres pais y den e texto di e statuut nobo a wordo poni cu e areglo transitorio ta como preparacion pa independencia di Aruba.

1994

Na 1994 y 1998 a cambia Statuut atrobe. Banda di algun asunto tecnico, e cambio mas remarcabel tabata ta cu a scrap e texto tocante e independencia di Aruba.

2001

Na 2001/2002 na caminda pa eleccion pa Tweede Kamer 2002, Statuut tabata prominente atrobe den noticia. Futuro politico PIM Fortuyn tabata papia e tempo ey di "Antiano ilegal na Hulanda" (loke no tabata e caso; segun Statuut, Antiano tin nacionalidad Hulandes y nan mag di ta tur momento na Hulanda) y tocante "cambiamento di e status di Aruba den un municipio di Hulanda" (loke cu Hulanda no por haci riba su mes; cambio di statuut ta rekeri cu tur pais di Reino ta bay di acuerdo).

2010

Na 2010 Antias Hulandes a keda desmantela. Despues cu Aruba a haya su Status Aparte dia 1 di januari 1986, Antias Hulandes a keda forma pa e islanan di Bonaire, Corsou, Sint Maarten, Saba y Sint Eustatius. Entrante 10 di october 2010, Corsou y Sint Maarten tambe ta bira pais autonomo den Reino, mientras cu e islanan chikito Bonaire, Saba y Sint Eustatius lo forma parti di Hulanda como municipio. Reino Hulandes ta consisti awor di cuatro pais: Aruba, Corsou,  Sint Maarten y Hulanda.