Hardin di Alimentacion na IPA

E dia aki ta coincidi cu diferente proyecto na IPA cu ta Aruba Doet y Cuida mi IPA.

Particpacion di Instituto Pedagogico Arubano (IPA) den e proyecto di agroforesteria ta un paso den formacion di nos futuro docentenan. Ta ofrece nan e hermentnan necesario pa duna les di agricultura sostenibel y siguridad di alimentacion. Asina ta inspira e siguiente generacion riba e importancia di cuida nos medio ambiente y provee pa nos mes. 
Preparacion pa cuminsa planta a inclui un presentacion tocante e practica di agroforesteria, dunando studiantenan y docentenan un bista profundo riba e beneficionan y mantencion di e hardin di alimentacion. E participacion di varios maestro ta subraya e compromiso di IPA cu educacion integral y aplicabel na bida real.

Segun Minister Ursell Arends, encarga cu Sector Primario, e introduccion di agroforesteria den nos scolnan ta un paso grandi pa incorpora practicanan di agricultura sostenibel den e educacion di nos hobennan. Cada inversion den nos docentenan ta un inversion directo den e futuro di nos isla, y mas importante, di nos muchanan.

E fruto di e proyecto ya ta visibel den e dedicacion di e comunidad escolar, e esfuerso incansabel di boluntarionan, y e apoyo di partnersnan di e proyecto, esta Santa Rosa y Living Soil.