Grupo di studiante a sali pa Hulanda
ORANJESTAD - Despues di varios luna di anticipacion y preparacion e momento grandi a yega pa mayornan tuma despedida di nan yiunan na Aerpouerto, cu tabata prepara pa aborda avion rumbo pa Hulanda, pa continua cu nan estudio.
En total a otorga 247 fiansa pa sigui cu un estudio avansa. En total tin 207 studiante cu lo continua cu nan estudio na Hulanda di cual 118 a haci uzo di e Arubalening Reisproduct. Esaki ta esnan cu a bula riba e vuelonan organisa.
Diadomingo 4 di augustus, e prome grupo di 58 bursal a sali cu vuelo di KLM pa Hulanda. Esaki tabata e grupo cu ta bay biba na Amsterdam, Arnhem, Den Bosch, Dronten, Enschede, Maastricht, Sittard, Nijmegen, Rotterdam, Tilburg, Utrecht, Wageningen y Zwolle.
Dialuna 5 di augustus, 60 bursal a aborda avion rumbo pa Hulanda, cu na nan yegada, lo sali pa nan respectivo ciudad, esta Breda, Delft, Den Haag, Eindhoven, Gouda, Groningen, Leeuwarden of Leiden.
Ademas di e grupo di studiante cu a sali pa Hulanda, tin varios studiante cu a scohe pa sigui cu nan estudio na un otro pais. 19 studiante cu a haci uzo di Seccion di Studiefaciliteiten, lo bay sigui cu nan estudio na Estados Unidos, 7 na Canada, 5 na Corsou, 4 na Spaña y 1 na Puerto Rico. Tambe tin 65 studiante cu a opta pa continua cu nan estudio na Universidad di Aruba, IPA of EPI.
No ta tur studiante cu ta bayendo Hulanda pa sigui cu nan estudio ta haci uzo di Arubalening. No tin indicacion di cuanto studiante ta bayendo Hulanda riba nan mes, pero 25 a acerca Arubahuis pa participa den e opnvangweek y tin 5 di nan cu ta biahando riba e buelo organisa.
Un di e retonan mas comun cu studiantenan cu ta bay den exterior ta enfrenta ta e situacion di vivienda. Den e caso di e studiantenan local, mayoria a logra haya un camber caba y algun falta un camber ainda pero ta premira cu nan lo keda cla pronto.
Gobierno di Aruba, den nomber di Departamento di Enseñansa y Studiefaciliteiten ta desea tur studiante hopi exito cu e paso importante aki.