Gran mayoria di ZorgPas ta caduca den 2025. Haci uzo di e AZV app of bo ID valido

Desde december 2019 AZV a introduci e carchi di AZV (e carchi di plastic), esta e “Zorgpas”. Den nos administracion nos ta wak cu tin un gran cantidad di cliente cu ainda tin un ZorgPas y ta haciendo uzo di esaki.

Carchi a caduca 

AZV ta informa tur asegurado cu tin un Zorgpas, cu e fecha di vencemento den 2025, pa tuma nota cu una bes e carchi di plastic caduca, AZV no ta traha carchi nobo mas. Awo ta mas facil. Descarga e AZV app y asina haci uzo di bo digiZorgPas. Esey ta e carchi digitalisa via e AZV app.

Kico mi responsabilidad ta? 

Como asegurado di AZV bo mester por prueba cu bo tin un polisa valido di AZV; pues semper ta bon bo tin bo AZV app y via bo AZV app bo ta mustra bo digiZorgPas. 
Den caso cu bo no tin un celular of bo no tin wifi na e momento cu bo mester bishita un instancia medico, a palabra cu e dunado di cuido, cu pa facilita e proceso, bo por presenta  (mustra) un ID valido (sea paspoort, cedula of rijbewijs) tambe. A base di bo ID valido e dunado di cuido ta controla si bo ta asegurado di AZV y cu polisa valido.    

Kico ta e responsabilidad di e dunado di cuido 

E dunado di cuido tin e responsabilidad pa controla cu cada servicio cu e ta duna ta pa un cliente ”legitimo” di AZV. Pa esaki e dunado di cuido ta haci uzo di un webportaal special cu ta disponibel pa e dunadonan di cuido. Riba e webportaal e dunado di cuido por check bo datonan y e valides di bo polisa. A base di e digiZorgPas of e ID valido cu abo ta presenta, e dunado di cuido ta controla cu e cliente su dilanti ta e persona corecto y cu e tin su seguro di AZV valido

Descarga e AZV app 

Den caso cu bo tin e AZV app, por descarg’e y instal’e riba bo cell. Tambe ta posibel pa añadi bo yiunan of un familiar den bo digiZorgPas. Riba e website di AZV tin un cantidad di video di instruccion cu por yudabo cu esaki. Pero bo por yama nos tambe na 5279900 pa asistencia, of pasa personalmente na nos oficina cu ta keda na Rumbastraat 21, di dialuna of diaberna di 7.30am-4.00pm.