Gobierno a reconoce Fitch Ratings pa nan 25 aniversario di trabou na bienestar di Aruba
ORANJESTAD - Na comienso di februari, Minister di Finansa y Cultura Xiomara Maduro, a ricibi bishita di Fitch Ratings cu cual Gobierno di Aruba tin 25 aña ta trahando.
Pa conmemora e aniversario aki, Minister di Finansa a brinda e ehecutivonan di Fitch un pida bolo preto manera custumber na Aruba, ora di celebra un aniversario importante.
Den presencia di e ekipo di Departamento di Finansa, a gradici Fitch Ratings pa e 25 aniversario di trabou na bienestar di Pais Aruba.
Ademas Gobierno ta gradici Fitch pa nan asistencia durante di e ultimo shete añanan, cu tabata crucial pa e bienestar financiero di Pais Aruba. Tabata un periodo den cual Aruba a pasa den menos bon tempo di un pandemia y den bon tempo di un recuperacion grandi riba e tereno di finansa publico.
Na final di e encuentro, Minister di Finansa a expresa cu tin tur confiansa cu Aruba lo por bay conta atrobe cu un grado di inversion cerca Fitch Ratings manera tabata na varios ocasion durante e 25 añanan tras di lomba.