Gobierno a decreta 6 di november como fecha nacional pa conmemora tur heroe cu a perde nan bida durante e Di Dos Guera Mundial

Diaranson mainta, 6 di november, Fundacion Parke Boy Ecury a celebra e fecha aki den grandi den presencia di Gobernador di Aruba, Su Excelencia Alfonso Boekhoudt, Presidente di Parlamento, Raymond Kamperveen, Prome Minister Evelyn Wever Croes, Minister di Cultura y Finansa, Xiomara Maduro, representantenan di Parlamento di Aruba y invitadonan special.

Prome Minister a indica cu e fecha di 6 di november a bira un realidad danki na e peticion cu Fundacion Parke Boy Ecury a haci na Gobierno di Aruba y Gobierno a cumpli cu nan deseo y a decreta fecha 6 di november como e dia pa recorda e heroenan cu a perde nan bida durante di Di Dos Guera Mundial. Riba e fecha aki Aruba ta para keto y recorda tur e heroenan Di Dos Guera Mundial pero specialmente Boy Ecury ken tawata parti di e resistencia Hulandes y na edad di 22 aña a wordo fusila na Hulanda pa su trabounan di resistencia y asina el a muri como un heroe y no como un traidor. Aruba semper lo recorda e frase di Boy Ecury; “Den cas di mi tata, no tin luga pa traidor”.

Prome Minister ta felicita y gradici e fundacion pa e trabou importante cu nan ta haci. E ta un bunita parke cu ta refleha historia di Aruba desde tempo di Antiyas y ora cu nos a haya nos Status Aparte. Ta trata di un iniciativa priva di señor de Veer y e fundacion.