Gobernador ta reuni cu representacion di Comision Nacional di Autismo
ORANJESTAD - Riba 11 di februari Gobernador di Aruba, Su Excelencia Alfonso Boekhoudt, a ricibi un representacion di Comision Nacional di Autismo pa un reunion di introduccion na Gabinete di Gobernador.
E representantenan tabata consisti di sra. Thiel-Span – Presidente Comision Nacional di Autismo, sra. Moreta – psikiatra infantil y adolescente di Respaldo y miembro Comision Nacional di Autismo y sra. Schoppema – Cabesante Centro Multidisciplinario y miembro Comision Nacional di Autismo.
Comision Nacional di Autismo ta comprometi pa mehora maneho y cuido pa personanan cu tin un trastorno di spectrum autista na Aruba. Cu representacion di varios organisacion denter di cuido di salud, educacion y e sector social, nan a traha un lista di prioridad cu ta identifica e retonan y necesidadnan mas grandi di e grupo aki.
Durante e combersacion cu Gobernador, e miembronan di e comision a comparti resultadonan y recomendacionnan pa pone un fundeshi solido pa un sociedad mas inclusivo.
Potret: © Kabinet Gouverneur Aruba
