Ganadonan di kavel pa Carnaval 71 lo cuminsa ricibi yamada

Notario sra. Hilde Rodriguez-Taekema y su team a  realisa y controla e sorteo, garantisando transparencia y cu e proceso a cana conforme ley.

Pa e aña aki, tin un total di 217 kavel pa reparti, di cual 81 ta situa riba Vondellaan y 136 riba L.G. Smith Boulevard. Ademas tin ventkavels disponibel cu ta reparti na districto di Noord cu 6, Oranjestad cu 7 y San Nicolas cu 11 kavel.

Na e momento cu Notario ta saca e ganadonan di kavel, e ta controla e validez di e peticion, entre otro check si e peticion tin un stampia, check si e peticion ta yena completo, corecto y firma y si e peticion ta hinca den e buzon corecto. Na momento cu notario saca peticionnan incompleto of incorecto, ta deshaci di esakinan mirando cu nan no ta valido. Si un persona su peticion a sali mas cu un biaha, e prome so ta conta mirando cu ningun persona por haya mas cu un kavel.

Notificacion cu a gana un kavel

Notario a entrega e procesverbaal na DIP cu e lista di ganadonan di Kavel. DIP lo cuminsa yama e ganadonan entrante 29 januari. Ta pidi pa tur peticionario keda pendiente di e telefon.

Documento y pago

Unabes cu e ganadonan di Kavel haya e yamada di DIP, e mester presenta cu un copia di ID valido y persoonsnummer na DIP personalmente of por entrega esaki via email na carnaval@dip.aw. Si tur documento ta na ordo, e persona lo ricibi un factura pa por haci e pago corespondiente.

Precariovergunning

Unabes cu cumpli cu e pago, DIP lo yama e persona pa traha un cita pa busca su precariovergunning pa kavel na DIP.

Si bo persona a gana un kavel y NO ta interesa mas, por favor entrega esaki bek na DIP. Den e caso aki lo otorga e kavel na e siguiente persona riba lista di reserva. Tene cuente cu NO ta permiti pa bende un precariovergunning. E ta castigabel pa ley.