Gaita
Ora cu december ta aproxima, e bos harmonioso di e gruponan di gaita ta duna e señal cu e temporada di Pasco a cuminsa. Gaita ta e nomber di un tipo di musica popular di Venezuela cu tin su origen den e ritmo indjan y cu ta procedente di Maracaibo (Venezuela). A introduci Gaita den añanan 60 na Aruba y for di e tempo ey e ta masha popular.
Despues di tempo musica di gaita a haya influencia di otro genero manera salsa, bachata y merengue. Den comienso e repertorio di e gruponan di Gaita tabata consisti di tema relaciona cu Pasco, pero awendia e textonan ta trata tema relaciona cu amor, romanticismo como tambe tema di indole social. Banda e instrumentonan original manera cuarta, tamborin y wiri, nos ta tende awor tambe piano, bas y trompet.
Grupo di gaita di 18 pa 20 musico ta compone y aregla nan tema musical den juni/juli y ta cuminsa graba nan musica den augustus/october. E gruponan di gaita ta toca durante actividad publico y priva di Pasco desde comienso di november te cu 25 di december. Nan ta entretene e publico cu ta haci compras den centro di ciudad durante e periodo di Pasco. E musica ta fascinante y e combinacion di harmonia y melodia ta excelente y cada un cu scucha ta contagia cu e ambiente festivo.