Fundacion Epilepsia Aruba ta bek
ORANJESTAD – Fundacion Epilepsia Aruba ta oficialmente bek despues di un tempo di inactividad. Fundacion Epilepsia Aruba awo tin un directiva nobo cu un compromise fuerte pa amplia conocemento y sosten pa hende cu epilepsia y nan sernan keri.
E lansamento oficial di e fundacion a tuma luga riba 26 di maart 2025, cu ta "Purple Day", un dia mundialmente reconoci pa crea conscientisacion di epilepsia. Esaki ta marca e inicio di un acercamento mas activo pa educa nos hendenan, duna sosten na personanan cu epilepsia y reduci e pensamentonan negativo rond di e condicion aki.
Dicon "Purple Day" ta Importante?
Na 2008, Cassidy Megan, un hoben di Canada, a funda "Purple Day" 2008 pa amplia conocemento global di epilepsia y pa laga hende cu epilepsia sa cu nan no ta nan so. Un dia importante riba cual miembronan nobo di Fundacion Epilepsia Aruba ta bolbe lanta e fundacion y ta reforsa su mision pa haci e condicion di epilepsia mas comprendibel den comunidad.
Iniciativa pa futuro
Parti di e vision nobo ta inclui varios programa y proyecto manera:
- Seizure Smart Aruba: Educacion publico y entrenamento di prome ayudo pa atake di epilepsia.
- Purple Lights Aruba: Un campaña visual pa ilumina edificionan publico na color biña.
- Epilepsy Voices: Un iniciativa di historianan real di parti di esnan cu e condicion aki.
- Programa di Radio y TV: Con campaña di conscientisacion pa kibra pensamento eroneo tocante epilepsia y duna sosten na personanan y sernan keri cu epilepsia.
- Purple Gala Dinner – Pa recauda fondo pa proyectonan den futuro.
Fundacion Epilepsia Aruba ta contento di por ta bek pa sirbi comunidad di Aruba, reforsando asina e compromiso di conscientisacion cerca e poblacion en general.
Pa mas informacion tocante Fundacion Epilepsia Aruba por bishita Fundacion Epilepsia Aruba riba media social @FundacionEpilepsiaAruba of manda email na arubapurple@gmail.com