Fitch Ratings ta hisa Aruba su rating na nivel di inversion
ORANJESTAD - Recientemente Fitch Ratings a informa Gobierno cu nan a hisa e rating na nivel di inversion pa Aruba.
Esaki ta indica na inversionista y turista cu Aruba ta un Pais na unda nan inversion ta sigura.
Na inicio di februari 2025, ehecutivonan di Fitch Ratings tabata na Aruba pa asina haci nan evaluacion financiero y economico di nos Pais pa cual nan a reuni cu diferente persona y instancia di interes. Entre nan a reuni tambe cu Minister di Finansa y Cultura demisionario Xiomara Maduro. E mandatario a splica mas di e maneho financiero hiba pa mehora nos finansa publico pa logra laga atras deficit presupuestario y crea espacio fiscal den surplus pa por reduci debe, haci inversion necesario y crea un buffer pa por enfrenta retonan financiero cu por surgi.
E anuncio aki ta importante pa Aruba, mirando cu ta di tres compania renombra, esta Standard and Poors y Moody’s y recien Fitch Ratings cu a duna Aruba un “investment” rating.
