Firmamento Memorandum of Understanding (MoU) cu Royal Schiphol Group
ORANJESTAD – Diahuebs 10 di april, 2025, Gobierno di Aruba a firma un Memorandum of Understanding (MoU) cu ta habri e caminda pa continua y fortalece e alianza strategico entre Aruba Airport Authority N.V. (AAA) y Royal Schiphol International B.V.
E MoU aki ta pone fin na un situacion di impasse cu a surgi durante e gobierno anterior y ta representa un paso crucial pa desaroyo sostenibel di e infrastructura di nos aeropuerto, fortalece nos turismo y crecemento economico pa Aruba.
Cu e acuerdo aki, ambos partido ta subraya nan compromiso y creencia den e importancia fundamental di e cooperacion entre AAA N.V y RSG pa e bienestar general di Aruba.
Acuerdo importante den e MoU aki ta inclui:
- Compromiso conhunto pa “good corporate governance” y desaroyo di talento local Arubano via e oportunidadnan di training den cooperacion cu Schiphol Academy, incluyendo entrenamento brinda na Aruba mes pa medio di Schiphol Academy;
- Intencion di Gobierno di Aruba pa otorga un exoneracion via decreto (landsbesluit) pa e normanan salarial di CEO y demas ehecutivo di AAA N.V.;
- E posibilidad pa Schiphol por propone un miembro den Hunto di Comisario (Raad van Commissarissen) di AAA N.V;
- Sosten activo di gobierno den negociacion entre AAA N.V y Schiphol tocante e renovacion di e acuerdo strategico di cooperacion.
Minister-President di Aruba, Mike Eman, Minister di Turismo Wendrick Cicilia, Minister di Finansa y Asunto Economico Geoffrey Wever y director di Schiphol International B.V., Kjell Kloosterziel a firma e MoU.