Fiesta di Dera Gay

E fiesta cultural di San Juan (Juan Bautista), miho conoci como Dera Gay ta data for di 1862 y nos ta celebr’e tur aña tur afo dia 24 di juni. Tin diferente version tocante e origen di e fiesta religioso y cultural aki cu Aruba ta celebra como un fiesta nacional. E origen religioso ta referi na e nacemento di Juan Bautista y e origin cultural ta referi na e fiesta di cosecha. Como fiesta cultural, dia di San Juan ta mas conoci pa su musica, baile, cendemento di candela, cuminda tipico y bebida. E colornan cu ta domina den e celebracion ta cora y geel. E colo geel ta pa e mata di kibrahacha cu ta floria durante luna di juni. Cora ta e colo di candela. Segun e tradicion e fiesta ta cuminsa dia 23 di juni ora cu e cunukeronan ta cende sobra di palo di maishi na candela p’asina cuminsa prepara pa e temporada nobo di cosecha. E cendemento di candela ta e simbolo di purificacion. 

Dia 24 di juni, despues di bahada di solo, e fiesta di San Juan ta cuminsa den diferente districto cu baile di Dera Gay, baile di bula candela y baile di bandera. E baile di candela ta pa proteccion contra malesa y mala suerte. Tambe tin e baile di bandera, diferente banderin ta wordo poni riba vloer y e bailado cu su wowo bon mara mester piki e banderinnan. E baile mas conoci t’esun di Dera Gay, unda e hende homber cu su wowo mara y c’un palo den su man mester purba mata e gay. Antes e bailamento ta tuma luga den sabana y ta dera un gay bibo pa e baile aki. Awendia ta uza sea un gay traha y e baile ta den club. Esunnan cu ta baila ainda den sabana of riba veld di tera ta uza un calbas. Henter e baile ta tuma luga bou tocamento y cantamento di e cantica di San Juan. E cantica ta conoci for di 1862. Ta acompaña e baile cu canto y musica folklorico. E instrumentonan musical mas uza ta fio, wiri, raspa y tambu. Cuminda y bebida na abundancia tambe ta parti di e fiesta.

E fiesta di San Juan y Dera Gay a bira hopi popular atrobe despues di añanan setenta y awendia Departamento di Cultura ta bishita e scolnan pa duna informacion y demostracion di e fiesta y e baile. Gobierno y organisacionnan cultural ta prepara pa celebra e fiesta cultural aki dia 24 di juni.

DERAMENTO DI GAY 

1.
San Juan ta bin, San Juan ta bay
San Juan ta bin, San Juan ta bay
At’e cu e palo den su man,
Cu su wowo bon mara.

Dere gay, dere gay
Coro: pa nos soye
Dere gay, dere gay
Coro: pa nos come
Dere gay, dere gay
Coro: pa nos plume
Dere gay, dere gay                                       2.
Coro: pa nos mate                                       Amigo tur ban hala un banda
Dere gay, dere gay                                       Pa Don Juan bay mata e gay
Coro: pa nos soye                                        Ate cu e palo den su man,
Dere gay, dere gay                                       Cu su wowo bon mara
Coro: pa nos plume

                                                                          REFRAN

3.
Don Juan cu e palo ariba bao
Ta balia bay pe mata e gay
Ata Don Juan a mata e gay,
Core mira, el a mate