Festival di Buki pa Mucha 2024: Dushi Cabesura!

Tur aña ta scoge un tema nobo pa duna e festival un ambiente diferente cu e meta pa stimula mucha pa sigui lesa buki.

E Festival di Buki pa Mucha ta dura un siman y ta tuma luga den prome siman di november.
Semper ta habri e festival cu un fiesta grandi cu ta tuma luga diadomingo dia 3 di november 2024. Den e siman di 4 pa 8 di november hopi autor tanto di Aruba como for di Hulanda, Corsou, Boneiro, St. Maarten y St. Eustatius ta bishita nos scolnan pa conta storia den klas y na biblioteca mientras ilustradonan ta duna presentacion ta con nan ta ilustra storia pa mucha. Di e manera aki ta purba di entusiasma e muchanan pa lesa mas, lesa hunto y bishita biblioteca mas.
Miembrecia di biblioteca ta gratis pa tur mucha y hoben bou 18 aña.

Un grupo grandi di escritor di buki pa mucha ta bishita mas cu 50 scol. Di Aruba esakinan ta:
Liliana Braamskamp-Erasmus, Vanessa Paulina, Irmgard Frans, Emerita Emerencia, Ariana Koolman, Gino Vrolijk y Robert Reeberg. For di Boneiro biblioteca ta presenta: Segni Bernadina. Di Corsou ta yama bon bini na Tio Ali, Mercee Doran y Crisen Schorea. For di Hulanda ta bini: Danielle Schothorst, Maria Karg y Sanne Rooseboom. Misha Spanner (Contado di storia) ta participa pa di dos biaha na e festival na Aruba y ta bini for di St. Eustatius. For di St. Maarten ta presenta Ralph Cantave. 

Biblioteca Nacional Aruba ta invita tur mucha lesa mas storia y buki. E coleccion di biblioteca ta inclui un cantidad di buki cu storia di personahe poco rebelde, poco stout kizas, tocante mucha cu tin un kier, mucha cu ta gusta dicidi pa nan mes y ta gusta aventura.