Economia di Aruba lo sigui crece segun Economic Outlook 2024-2025

E raport ta duna un bista riba e desaroyonan economico di nos isla, subrayando e desafionan y oportunidadnan cu nos ta confronta den e economia global y regional.

A enfatisa cu aunke Aruba a continua su trayectoria di crecemento economico despues di e pandemia, ta importante pa keda alerto pa presionnan inflatorio y tension politico mundial cu por tin un impacto riba e prijs di importacion di productonan y servicio.

Compara cu 2022 y 2023, ta mira un aumento significante den Producto Interno Bruto (GDP) nominal, cu un crecemento anual di 13.7% segun calculacionnan di april 2024. E GDP nominal pa 2023 (Afl. 6,829m) tabata igual na 112.3% compara cu nivel di 2019 (Afl. 6,080m).

Pa 2024, ta spera cu e GDP lo aumenta pa 8.5%, sigui pa un crecemento mas modera - "baseline scenario" - di 1.3% den 2025. E expectativa ta cu e GDP nominal pa 2024 (Afl. 7,408m) lo ta na 121.8% di nivel di 2019, mientras cu e GDP nominal pa 2025 (Afl. 6,080m) lo ta na 123.4% di nivel di 2019.

Segun e “Economic Outlook” ta premira un inflacion di 3.1% pa 2024 y 2.5% pa 2025. E dependencia di importacion ta nifica cu factornan manera disrupcion den e fluho normal (internacional) di productonan, servicio y capital por afecta e tasa di inflacion na Aruba.

Mientras turismo ta keda e motor principal di crecemento, ta sigui haci esfuerso pa diversifica e economia. Turismo ta proyecta pa crece 14.0% den 2024 cual ta 53.2% mas halto compara cu 2019, y lo sigui crece den añanan binidero, contribuyendo na crecemento economico general. Pa 2024, ta spera un aumento den inversion di 11.7%, cu un aumento den inversion publico, mientras cu inversionnan priva den otro proyectonan di hotel lo continua y finalisa fin di 2024.

Pa facilita proyeccion di e economia di Aruba, DEACI ta haci uzo di e modelo macro-economico MARUBA. Maneho di e modelo MARUBA ta cay bao responsabilidad di DEACI. Pa yega na e proyeccion economico, DEACI ta den dialogo continuo cu diferente instancia y experto local, y a base di analisis di diferente desaroyo, ta produci proyeccionnan economico.

Pa mas informacion por tira un bista riba e Economic Outlook 2024- 2025.