E di 16 edicion di Arte di Palabra (AdP) lo tuma luga dia 5 di april 2025
ORANJESTAD – Departamento di Cultura Aruba (DCA) ta organisando e di 16 edicion di e proyecto ‘Arte di Palabra’ (AdP) cu ta un competencia di conta cuenta y di storia cortico, y skirbi y declama poesia pa hobennan escolar.
Esaki ta un competencia pa alumnonan di scol avansa cu DCA ta organisa for di 2009 y cu cada aña ta haya mas interes di nos hobennan pa participa.
E aña aki, Arte di Palabra lo tuma luga dia 5 di april 2025 for di 5:00 PM - 8:00 PM na Cas di CUltura. Entrada ta completamente gratis y porta lo habri pa 4:30 PM.
E hobennan cu ta participa ta di Juliana School, Colegio Arubano, Ceque College MAVO, Maria School, Abraham de Veer, Mon Plasiar MAVO y HAVO, Colegio Nigel Matthew y EPI.
Meta di e proyecto aki ta pa duna hobennan e oportunidad pa demostra nan creatividad literario; pa promove lesamento y skirbimento den nos idioma Papiamento y pa stimula publicacion di arte literario den Papiamento.
Cu e proyecto aki DCA ta traha hunto cu Fundacion Corectornan Papiamento Aruba. Pa medio di e competencia aki di Arte di Palabra ta stimula e hobennan pa medio di nan poesia of cuenta cortico haci bon uzo di nos idioma Papiamento y enrikece nan conocemento di nos idioma.
Ora di saca informacionnan cultural di tur loke ta publicacion, DCA ta haci su esfuerso pa percura pa tur ta den bon idioma Papiamento. Na momento di duna relato den forma oficial, DCA ta aplica e Vocabulario Ortografico di Papiamento di 2009.
Den sentido general ta considera idioma, como e medio unificado di mas importante di un cultura. Idioma ta carga tur pensamento y experiencia humano, cultura y identidad. Idioma ta transferi cultura. Mirando esaki DCA tin idioma Papiamento como un punto importante den su educacion cultural.
Ortografia, idioma, literatura den lenga materno, nan tur ta un simbolo sumamente importante, como muestra di un propio identidad. Mester mustra cu e oficialisacion por crea aprecio y stimula nos pa, cu orguyo y amor, siña nos hendenan conoce e historia di nos idioma materno bon y promove e uzo corecto di papi’e y skirbie (papia- y skirbimento).
Durante e desaroyo di nos idioma materno Papiamento y como Departamento di Cultura Aruba bou auspicio di Ministerio di Cultura ta keda enfoca pa su retonan pa educa, promove, cuida y hacie mas conoci e bon uzo di nos Papiamento pa generacionnan cu ta bini.