DVG cu encuesta “Kico nos ta come” hunto cu CBS, IBISA, WEB Aruba NV y otro stakeholders
ORANJESTAD - Recientemente Departamento di Salud Publico (DVG), IBiSA y WEB Aruba NV, a anuncia un encuesta yama “Kico Nos ta Come?" “Kico nos ta come?” ta un “Total Diet Study” (TDS) cual ta contene informacion di nutricion valioso pa salud publico.
E ultimo data disponibel di un TDS cu a haci na Aruba, ta di 1993.
Judelca Briceño di Management Team di DVG, a anuncia un programa/proyecto, hopi importante den cuadro di nutricion di nos pueblo. Na 2023 DVG a haci un encuesta yama STEPS Survey, den cual a haya un bista riba obesidad y sobrepeso na Aruba.
E data di e encuesta aki a demostra cu 79% di nos pueblo ta sufri di sobrepeso, di cual 46% ta clasifica como obeso. E cifranan aki ta un indicacion, y ta hopi importante pa
DVG, por crea programanan pa wak con, conhuntamente cu comunidad di Aruba, por frena e problematica aki, pero tambe mitiga y evita e consecuencianan cu obesidad y sobrepeso ta bin cu ne.
Despues di e resultado di STEPS Survey, DVG ta haya importante pa haci uzo di e data aki, y pa despues di tanto aña, bolbe haci un estudio di importancia pa Aruba. Esaki lo ta un estudio cientifico cual lo duna DVG un miho bista di e contenido di nos nutricion.
Hopi biaha nos ta come pero nos no ta consciente di kico e cuminda cu nos ta come ta contene, y kico ta e particulanan cu e ta consisti di dje. Na momento cu nos haya e resultado di e estudio aki nos sa mas tocante kico nos populacion ta consumi, e lo yuda DVG pero tambe otro stakeholders pa bin cu programanan di intervencion y maneho cu por yuda gobierno y departamentonan di gobierno, educa nos comunidad, mas ‘to the point’ pa adapta nos alimento pa uno mas saludabel.
E encuesta aki ta tuma lugar entre 24 di maart y 30 di juni 2025.
