DVG a subi caya pa busca producto infecta cu Hepatitis A

Mesora DVG su seccion Warenkeuring en Hygiëne, a subi caya y haci bishita na algun supermercado specifico conoci pa ta bende productonan procedente di Hulanda.

Ta un supermercado na Aruba ta bende e marca specifico aki di Albert Heijn (AH) y ya caba DVG a notifica nan di e problema cu e producto, pa cual motibo nan a saca tur e productonan for di nan vriezer. Apesar cu DVG no por a topa cu e producto cu e number di produccion specifico, a conseha management di e supermercado pa verifica cu nan no tin e producto aki warda den nan warehouse y si esaki ta e caso pa deshaci di e pakinan cu ta caduca entre april 2025 y april 2026.

DVG ta haci un yamada tambe na comunidad y na sector hotelero pa controla si nan por tin e producto aki den nan disposicion. Si esaki ta e caso ta haci un apelacion pa no consumi e producto y deshaci di esaki mirando cu e por ta contamina cu e virus di hepatitis A. Te na e momento aki DVG no a registra ningun caso di hepatitis A cu por ta vincula cu e producto aki, pero lo sigui monitor esaki di cerca.

Hepatitis A ta ocasiona pa un virus cu ta plama di hende pa hende na momento cu un persona ingeri cuminda of bebida contamina cu e virus procedente di un persona infecta cu a bay wc y sea no a laba su man of no a laba esaki suficientemente bon. E virus di Hepatitis A ta ocasiona inflamacion di higra y ta duna e sintomanan di diarea, cansancio, keintura, dolor di join, perdida di apetit y sacamento.   

Pa mas informacion like DVG su Facebook page Directie Volksgezondheid DVG Aruba, Follow riba Instagram directie_volksgezondheid aruba, subi riba www.dvg.aw, yama 5224200 of manda bo email na servicio@dvg.aw