drs. Andy Lee a huramenta como Miembro di Raad van State pa Aruba

Durante e ultimo 6 añanan, sra. Milly Schwengle a ocupa e funcion aki y a representa
Aruba dignamente haciendo un excelente trabou.

Andy Lee tin un trayectoria profesional hopi amplio y sigur un escogencia adecua di e
representantenan di un comision independiente pa nombra Andy Lee pa representa
Aruba den e funcion aki. Basa riba e recomendacion aki, Conseho di Minister di Reino,
durante e reunion di diabierna 24 di november 2023, a aproba su nombracion.

Prome Minister Evelyn Wever-Croes a expresa di ta contento cu Aruba tin un
representante pa Aruba den Raad van State, cu e cualidad y experiencia amplio cu sr.
Lee ta posee, pa por tuma e miho decisionnan den bienestar di Aruba.

Rendolf Andy Lee ta un politicologo cu mas di 30 aña di experiencia den sector publico
y semi-publico na Aruba, Corsou y Washington. E tabata Director di CBS Aruba,
Gerente di Departamento di Investigacion di Banco Central Aruba pero tambe miembro
di Parlamento entre 2005 te cu 2011 y a fungi como presidente di Parlamento entre
2009 y 2010. Despues sr. Lee a ocupa e funcion di Minister Plenipotenciario na Washington pa Aruba y tawata consehero di Prome Minister entre 2018 y 2020.

Despues di su huramentacion diaranson ultimo, sr. Lee a cuminsa traha
inmediatamente den Raad van State pa Aruba. Den nomber di Gobierno di Aruba,
Prome Minister ta felicita sr. Lee y ta dese'e hopi exito den e cargo nobo aki.