DOW ta lansa programa di patruya di caminda irisGo

Esaki ta un sistema innovativo cu lo yuda DOW detecta e estado di careteranan na Aruba. 
Ya pa un tempo Gobierno di Aruba ta trahando pa DOW por haya fondo pa drecha camindanan y asina Gobierno a logra presupuesta 18 miyon florin pa aña pa inverti den esaki y e ta den presupuesto 2025 caba y lo continua asina.

“irisGO” ta un sistema di patruya di caminda automatisa podera pa AI (Artificial Intelligence) cu ta haci inspeccion inteligente y ta detecta entre otro, estado di caretera, acera, borchinan, grafiti y matanan cu ta obstrui trafico. “irisGO” ta traha a traves di un aparato instala den un auto, cu ta consisti di un sistema di camara cu ta scan e area. Aruba ta e prome pais den Caribe cu lo tin e sistema aki, unda ta colecta datanan valioso y asina DOW ta schedule e tareanan cu lo ricibi for di e sistema y pone nan den e rutinanan diario.

Prome Minister Evelyn Wever-Croes ta felicita DOW pa e proyecto asina innovativo pensando riba bienestar di Aruba y kedando up to date cu tecnologia.