Disfruta y siña mas di monumentonan di Aruba na Museo Arkeologico Nacional

Museo Arkeologico Nacional Aruba (MANA) tambe ta forma parti di e Paseo Monumental cu ta inclui 13 monumento cu ta habri pa publico diadomingo awor di 10’ or di mainta pa 3’or di atardi. Na MANA participantenan di scol basico por haya nan stempel den nan paspoort cultural y na fin di dia dilanti Postkantoor na Playa lo saca ganado di e ‘recorido monumental’.

Edificionan historico cu ta forma parti di MANA a ser declara monumento protegi legalmente na 2010. Cada un tin su historia cultural, beyesa y arkitectura. Presente na MANA lo ta dos nieto di Dundun Ecury cu lo comparti nan recuerdonan di nan grandinan y di diferente edificio. Unicamente diadomingo awor e prome piso di Cas Dundun ta habri pa publico. Sera conoci cu Cas di Mamachi, Cas Dundun cu su balcon
impresionante y tambe e cambernan di drumi di entre otro Boy y Nicky Ecury.

Ademas bishitantenan por mira e documentario cortico “Dada Picus”, produci door di Rebecca Roos Productions y co-financia pa UNOCA. Dada Picus a traha diferente monumento na Aruba y ta ser reconoci como arkitecto cu un estilo unico.

Arkeologo Raymundo Dijkhoff lo duna un charla cortico di e monumentonan arkeologico terestre y sub-aquatico pa 11'or di mainta y 1'or di merdia.

Tambe MANA ta duna oportunidad pa recauda fondo pa un bon causa y e biaha aki a toca grupo “Hunto mane un famia” cu lo percura pa un bar y cushina bon surti. Lo ofrece entre otro un festival di sopi, snack crioyo, popcorn y dushi juice di lamunchi.  

Durante di dia lo tin varios actividad pa mucha manera pintamento di cara, “sensory box” y mucho mas, y presentacion di diferente banda tipico cu lo toca riba e plenchi dilanti di MANA y Monumentenbureau cu tambe lo ta habri pa publico. Bin cera conoci cu mas di 13 monumento na Playa y pasa un dushi rato cu famia y amigonan.