Despues di algun tempo di trabao intensivo y planificacion, DIMAS tin e placer di informa, cu entrante 10 di juni 2024, tur persona cu ta busca informacion di nan permiso, of tin cualkier pregunta general relaciona cu e proceso di aplica pa permiso, documentonan necesario pa cierto permiso etc, por tuma contacto cu DIMAS a traves di WhatsApp.

E contacto via WhatsApp lo simplifica y facilita e contacto entre comunidad y DIMAS. Cada mensahe via Whatsapp ta atendi directamente pa e ekipo di Front Office di DIMAS, cu a ricibi training riguroso pa facilita henter e proceso di comunicacion aki.

Mirando e avanse acelera den tecnologia y comunicacion, DIMAS a haya prudente pa "catch up" y cumpli cu e metodo di comunicacion mas uza na Aruba y den region. E integracion di WhatsApp awo ta conecta e cliente y DIMAS di forma eficiente y conveniente, y ta provee e cliente tur informacion cu e tin mester di forma rapido y directo.

Pa tuma contacto cu DIMAS a traves di WhatsApp, subi www.dimasaruba.aw. Riba e pagina principal ta haya e simbolo di WhatsApp, primi riba esaki y bo ta conecta cu e personal di DIMAS, durante orario di trabao entre 7:30 am y 4:30 pm. di dialuna pa diabierna

E iniciativa aki ta refleha e compromiso di DIMAS pa uza avansenan tecnologico pa sirbi e comunidad na un manera mas efectivo y eficiente.