E aña aki ta enfoca riba e tema "Spierta e profundidad den nos" cu ta pone enfasis riba e importancia di compronde miho e parti misterioso di oceano y e papel crucial cu e ta hunga den salud di nos planeta.

Directie Natuur en Milieu (DNM) ta reconoce e importancia pa yega na solucion pa conservacion di e oceano pa cual ta trahando riba e NBSAP, e maneho “Nos Plan di Maneho pa Naturalesa di Aruba” cu ta basa riba e Global Biodiversity Framework (GBF) cu ta e resultado di e conferencia di e partidonan na e Convention of Biodiversity (COP 15) na 2022.

E lista di prioridad cu meta y obhetivo den e concepto “Plan di Maneho pa Naturalesa di Aruba” ta inclui obhetivonan pa e lama cu ta rondona Aruba.
Islanan manera Aruba ta depende riba un oceano saludabel pa turismo, pesca y bienestar general di nos comunidad. Pero contaminacion, sobreturismo y cambio climatico ta un menasa serio na salud di nos lama.

Con nos por conserva e oceano? 

• Reduci consumo di plastic desechabel;
• busca productonan sostenibel cu ta bon pa medio ambiente;
• no uza producto antisolar cu ta contene oxybenzone;
• reduci consumo di awa y energia na cas;
• participa den accion di limpiesa na lama y den lama y of otro actividad di conservacion;
• educa bo mes y otronan riba e importancia di conserva nos oceano.

Durante Dia Mundial di Oceano ta organisa diferente actividad pa promove conservacion di nos recurso. Hunto nos por traha pa un futuro unda nos oceano ta saludabel y vibrante pa generacionnan nos dilanti. 
Pa mas informacion riba Dia Mundial di Oceano, por favor bishita e pagina web oficial di Nacionnan Uni https://unworldoceansday.org/.