Dia Mundial di Obesidad: Laga nos papia di obesidad

E tema di Dia Mundial di Obesidad e aña aki, "Cambia Perspectiva: Laga nos papia tocante obesidad" y ta cuadra cu e vision di Ministerio di Salud Publico pa cuido preventivo di salud. E tema aki ta uno hopi importante y ta un recordatorio pa sigui traha riba prevencion pa yega na un Aruba mas saludabel.

Ministerio di Salud hunto cu partners manera DVG-Health Promotions, Plataforma di Salud, Healthy Lifestyle Center, Ibisa, Jump18 y Cool2BFit ta comprometi riba prevencion. Door di fomenta combersacionan riba e tema aki, kita e stigma, y desafia conceptonan falso, ta logra e meta di crea un sociedad cu ta compronde tur problema cu ta bin cu obesidad.

Obesidad no ta solamente un lucha personal, pero un reto social unda hunto, por logra. Ministerio di Salud Publico ta dedica na implementa maneho cu ta promove estilo di bida saludabel, cuido di salud alcansabel pa un y tur, y ta encurasha un comunidad cu ta sostene otro den e lucha aki. E enfoke ta riba prevencion, y trahando hunto por logra avancenan significativo den e lucha contra obesidad.

Ta encurasha tur ciudadano pa tin e curashi, pa comparti nan storia y sostene otro riba e caminda pa un futuro mas saludabel. Hunto como un pueblo mester conscientisa otro, boga pa un cambio y intercambia conocemento pa crea un ambiente cu ta stimula bienestar pa un y tur.

Un sociedad mas saludabel ta cuminsa cu cada un di nos tumando decisionnan consciente pa nos mes salud. Hunto, nos mester traha pa un Aruba unda cuido preventivo di salud no ta solamente un strategia, pero un estilo di bida.