Descripcion di e plan

Desaroyo Teritorial di Aruba 2019 (ROP 2019) 

Riba 15 di januari 2019 a publica un concepto pa un Plan pa Desaroyo Teritorial di Aruba nobo. Te cu 15 di maart 2019 a brinda oportunidad pa entrega punto di bista (zienswijze). E concepto a wordo ahusta y contestacion riba tur punto di bista cu a entrega a keda incorpora den e Nota riba Punto di Bista (Nota Zienswijzen). Por medio di Decreto Nacional no. 1 di 17 di juli 2019 e Plan pa Desaroyo Teritorial di Aruba 2019 (ROP 2019) a keda ratifica.

Por download y tambe tuma nota di forma digital di e ROP 2019, e mapa, e Decreto Nacional no. 1 di 17 di juli 2019, e splicacion riba ROP 2019, e Nota riba Punto di Bista y un mapa di structura ecologico principal:


Por tuma nota di ROP 2019 na oficina di Departmento di Infrastructura y Planificacion (DIP) tambe. 

Siguientemente por haya informacion relaciona cu e prome ROP (bieu).

General

ROP tin cu crea condicion den cua ta uza e calidad caracteristico di Aruba optimalmente
Calidad teritorial ta existi entre otro di un variedad di paisahe riba un superficie relativamente chikito:

  • noordkust bruto y keto;
  • un teritorio di cero grandioso y magico;
  • variacion unico den Spaans Lagoen/Franse Pas;
  • superficie extenso di saliña;
  • costa west ‘golf, surf ’n sun’ relaha;
  • sabana cu forma di golf suave rond di Hooiberg y Kristalberg;
  • lagunnan parti zuid cu mata di mangel y rif;
  • caminda di santo cu trankera den area teritorial;
  • ademas e atmosfera relaha y amabel den un ambiente unda e aspecto humano ta central ta di un balor grandi;
  • biba agradabel den bario trankil y espacioso;
  • no demasiado masa di hende den industria turistico;
  • relacion social estrecho den un comunidad uni;
  • hopi mescla di area berde rond y mey mey di construccion.

Pa termina tin orientacion internacional y carisma:

  • facilidad adecua di transporte;
  • experticio turistico;
  • atencion personal “we speak your language’;
  • variacion cultural den unidad den forma di trata hende

Zonificacion

Ta uza zonificacion pa mantene e caracteristicanan teritorial menciona y unda ta necesario fortalece nan, Zonificacion ta nifica cu areanan ta dividi basa riba caracteristica teritorial y/of funcional. Asina por ehempel tin zona urbano y zona natural. Bentaha di zonificacion ta cu pa cada zona ta ehecuta un maneho specifico. Duna algun funcion na un zona por nifica extra calidad, pero den un otro zona e por kibra caracter di e zona.

Un tienda por tin balor adicional den un area urbano, pero no den un area natural. Door di zonificacion por stimula e resultado desea y para esun no desea.
Na mes momento por mantene e diferencia entre zona. Door di esaki e chens pa mantene e calidad caracteristico ta keda garantisa.

Por distingui tres zona aproximadamente:

  • area urbano na e parti zuid-west;
  • area natural na parti noordoost y
  • area rural, situa entre area urbano y natural.

E prome dos zona principal ta dividi mas aleu, unda finalmente a diseña un sistema di nuebe zona. Ademas e area di costa ta dividi den cinco zona, cu ta complementa e caracteristicanan di e area delimita, ambiente natural y trafico riba awa. Riba e mapa tin ademas e elementonan poni cu liña y simbolo, cu zonificacion como base, cu ta forma e sistema na cua e reglamentacion riba e desaroyonan (no)desea ta conecta. Den e proximo paraaf por haya mas detaye. Hunto cu e structura di caminda desea nan ta forma e mapa.

Mapa ROP

ROP ta registra e desaroyo desea riba dos mapa di e plan: un mapa terestre y un mapa maritimo. Ta menciona e calidad y posibilidad pa desaroyo segun teritorio of zona. E mapa aki ta ilustra un combinacion di e mapa teritorial y e zonanan di e mapa maritimo.

Pa cada parti di legenda (legend – nota marginal) di e mapa ta duna su significado y ta menciona den corto algun elemento principal di maneho for di descripcion di plan.

Area urbano principal (Oranjestad)

Oranjestad evidentemente ta e capital di Aruba, no solamente for di punto di bista estatal, pero tambe basa riba cantidad di habitante, ubicacion central, tienda y luganan di recreo y e cantidad di oficina (di gobierno). Pesey tambe ta considera Oranjestad un area  urbano principal (nucleo primario). E capital tin un superficie di

10km2 cu casi 7500 edificio, cu  un concentracion hopi grandi den y rond di centro. Su ubicacion banda di lama, un haf pa crucero y yate y hopi monumento ta haci Oranjestad un ciudad unico na Aruba, no solamente pa ciudadano, pero tambe pa e turista. Presencia di oficina di gobierno y e mescla grandi di tienda, hotel y restaurant y otro funcion ta contribui na e ambiente di e capital principal.
Oranjestad tin e potencial pa desaroya su mes den un ciudad atractivo tanto pa su habitantenan, negociante como pa e turista.

E siguiente guianan di maneho ta aplicabel pa Oranjestad:;

  • revitalisa centro di ciudad (caya grandi)
  • stimula varios uzo di area (por ehempel bou di tienda y riba cas)
  • fortalece area di vivienda
  • protecha edificionan monumental
  • re-uza edificionan bandona 
  • mehora accesibilidad; e cantidad di trafico continuo tin un relacion importante cu realisacion di ringweg 2 (pa alivia problema di trafico riba La Sallestraat) y construi ringweg 3 (schakel cu falta den direccion oost-west);
  • mehora stacionamento di vehiculo, aki tambe tin un relacion importante cu otro area di haci compras riba e isla;
  • aumenta concentracion di construccion (yena tereno bashi, mantene porcentahe minimo pa construccion y altura di construccion;

Area urbano (Noord y San Nicolas)

Ta considera tanto Noord, como San Nicolas como area urbano, basa riba entre otro nan ubicacion geografico riba e isla, cantidad di habitante y e tiendanan existente, (di dos ordo).Despues di Oranjestad, nan ta e concentracion urbano mas importante na Aruba. Maneho teritorial na San Nicolas ta dirigi pa laga e nucleo aki

funciona (atrobe) como un  area urbano total di segundo orden. Lo no percura solamente pa vivienda digno pa e comunidad, pero tambe pa facilidadnan corespondiente. Ademas di facilidad cu ta habri tur dia na San Nicolas, por instala facilidadnan cu no ta habri tur dia pero cu tin un funcion di cuido regional. Ehempel di esaki ta sucursal di educacion secundario, facilidad pa haci deporte pero tambe negoshi cu funcion di cuido regional (por ehempel sucursal di banco).


Crucial pa desaroyo di San Nicolas ta evita cu edificio historico den e centro di ciudad sigui deteriora. Proposicion pa mehora area aki, incluyendo area di village ta poni den capitulo 2 di San Nicolas & Sero Colorado development plan

Tanto den plan di Sasaki como den rapport “Winkelfunctie in beweging” tin proposicion concreto pa desaroya San Nicolas door di instala un down town management organisation c.q. y nombra un “manager pa caya”. Bou di responsabilidad di un organisacion semehante por construi un area pa haci compras balansa y recupera edificionan monumental.

Demas area

Den e areana residencial (Tanki Flip, Tanki Leendert, Paradera, Piedra Plat, Santa Cruz, Pos Chikito y Savaneta) ta existi un desafio importante pa concentra facilidadnan diario na luganan cu ta facilmente accesibel.

Door di destina e zona di hotel, aeropuerto, Barcadera y e refineria como sorto di zonanan apart pa desaroyo economico, cada un di nan por desaroya nan mes segun nan forma/manera specifico. Esaki ta duna e comerciante mas siguransa y asina ta fortifica diversidad economico di e pais. Ta tene cuenta cu ehecucion di proyectonan grandi manera mudamento di haf di container y di zona liber pa Barcadera. Na Sero Colorado, den forma di un reserva pa loke ta trata expansion di turismo, ta aspira pa mehora e plataforma economico pa San Nicolas.

E areanan berde den hopi caso ta consisti di rooi y frecuentemente ta forma un bufer entre areanan urbanisa. E zonanan berde aki ta di gran importancia pa drenahe, pero tambe pa reconocemento y posibilidad di recreacion. E maneho ta dirigi pa mantene e caracter di naturalesa conhuntamente cu e posibilidad pa uzo recreativo modera y lo tin cu  determina esaki segun midi pa cada area berde. E zonanan berde ta forma rond di e sistema di rooi, tanki y dam un vinculo estrecho cu e zonanan di saliña y ‘wetlands’, pa cual ta conta cu un maneho masha restrictivo.

Por mantene e caracter specifico Arubano di area di campo cu cunucu y sabana na un miho forma door di actua cu cautela den caso di construccion nobo (residencial) y pa conserva mas tanto posibel e funcionnan original. Asina mes a reserva un espacio den parti di e area rural pa den un fase mas leu di e plan di desaroyo por soluciona eventualmente scarsedad di tereno pa traha cas atrabes di e reserva pa expansion di centronan residencial.

Por ultimo ta indica e areanan di naturalesa na unda conservacion di flora y fauna ta central. Parke Nacional Arikok, Spaans Lagoen y e rifnan, pero tambe e costa panort y p'ariba (Salt Spray Park) ta bon ehempel di area natural cu un caracter unico.

Mayoria di paisahenan special, cu ta marca cu punaise riba e mapa, ta keda den e areanan di naturalesa. Preservacion y un maneho corecto pa fortifica calidad unico, ta e reto pa e elementonan rural y paisahenan historico.
Ademas ta indica cu símbolonan e nivel di e centro urbano. No ta tur area residencial tin un centro di compras y splicacion pa loke ta trata herarkia den e centro di facilidadnan ta limita na e lugarnan marca riba e mapa.

E mapa teritorial tambe ta indica e infrastructura mas importante: e camindanan y aeropuerto y haf. Defini caminda ta importante pa mehora trafico y pa un miho fluho di trafico.

 E caminda principal Noord-Oranjestad-San Nicolas ta e weso di lomba di e red di trafico, cu mester tin mas menos cu ta posibel molester di funcionnan directamente accesibel.

E camindanan cu ta conecta Oranjestad cu diferente centronan residencial y cu ta entre e centronan residencial ta respalda e facilidadnan (comercial). E diferente ringwegnan  proyecta y e caminda nobo pa San Nicolas ta conexionnan den e sistema principal. E camindanan colectivo den bario por apoya funcionnan comercial mas tanto riba nivel local. Rutanan di accesibilidad no ta conecta centronan residencial cu otro y ta menos adecua pa conecta cu facilidad comercial.

E influencia di Aeropuerto ta indica cu circunferencia di nivel di zonido cu e avionnan cu ta subi y baha ta ocasiona. Acceso pa navegacion tambe ta indica door cu e actividadnan di haf relaciona ta concentra den e vecindario.

Area di costa

Riba e mapa maritimo e awa di laman banda di nos costanan ta dividi den cinco zona costero y ta ilustra con e sistema di drenahe ta funciona pa medio di rooi, tanki y saliña. Tambe ta indica e luganan na unda ainda tin basta mangel ta crece, cu e meta pa conserva nan.

E importancia pa mantene y mehora rooi y saliña ta keda demostra tur aña durante periodo di yobida. E urbanisacion creciente ta haci e solucion pa e problema creciente di awa manera e dicho conoci 'carga awa hiba laman'.

E clasificacion di awa na costa den cinco categoria ta  basea riba funcionnan dominante. Asina tin cuatro parti di e costa cu ta indica como parke marino reserva, pasobra den e partinan aki ta papia di e conexionnan ecologico miho conserva y di mas variacion. E resto di e costa parti panort tambe ta marca como e zona na unda e balor di naturalesa ta na prome luga.

E ordenacion y uzo di e costa occidental ta fuertemente domina door di e funcion turistico na gran escala, 

locual ta conduci na uzo recreativo intensivo di e awa na e costa como funcion principal. E zona aki ta delimita door di e luganan pa hancra manera fiha den e convenio internacional pa nabegacion cu tambe ta marca riba e mapa.

Den un gran parti di e costa pazuid e influencia pa nabegacion mas pisa y su caracter economico ta domina. Aki e necesidad pa un profundidad suficiente y un ruta sigur pa barconan di carga y crucero turistico ta na prome luga.

E ultimo categoria ta e area di rif, unda e calidad ta determina principalmente door di e uzo limita, trankilidad, poco trafico motorisa, boto di pisca tradicional y forma pasivo di recreacion den un ambiente romantico.

E reparticion aki di e awa di laman banda di nos costanan ta e base pa trata e diferencia pa loke ta trata posibilidad riba tereno di construccion di hotel, horeca, construccion di pier y luga di mara boto, maneho di beach, regulacion di deporte acuatico, uzo recreativo y desaroyo di naturalesa.

Un descripcion extenso di e mapa di ROP y mapa por haya den capitulo cuatro di descripcion di e plan.