Den conexion cu Dia di Betico, Prome Minister a bishita varios scol basico.
ORANJESTAD - Tur aña, un siman prome cu e celebracion di Dia di Betico, Prome Minister Evelyn Wever-Croes ta cuminsa cu su bishitanan na varios scol basico na unda e tin e oportunidad di duna charla riba bida, lucha y logronan di Aruba su Libertador Betico Croes.
Riba e prome dia, dialuna 20 di januari Prome Minister a bishita y a duna charla na klas 5 di Reina Beatrix School, Maria Goretti College y na klas 6 di Cacique Macuarima. Akinan e tabata tin e oportunidad di combersa y duna su charla na alumnonan. Prome Minister a expresa cu e alumnonan aki ya caba sa hopi di e bida di Betico, pero a haci algun pregunta di cual Prome Minister a contesta.
Prome Minister a expresa cu e bishitanan aki semper ta yene di orguyo, pasobra e ta realisa con hopi e muchanan cu ta nos futuro generacion sa di e bida di Betico, y esaki ta yuda hopi na mantene e legado di nos Libertador bibo. E ta sigur importante pa e muchanan aki lanta y crece sabiendo cu cada un di nan tin algo di Betico den nan, y cu si nan tin e determinacion, nan lo por logra cosnan grandi den futuro pa pais Aruba.
Prome Minster a gradici e cabesantenan di scol y e docentenan y alumnonan.. E docentenan a haci un bon trabou den educa e alumnonan di klas 5 riba e historia di Betico Croes y riba tur loke el a significa pa pais Aruba. Alabes kier a invita cada un di nan y e alumnonan tambe pa e manifestacion cultural cu lo tuma luga diabierna 24 di Januari pa 7:30 pm, na Plaza Betico Croes, cu ta un expression entre otro di canto, baile, poësia masha bunita. Tambe lo tin varios tent di cuminda y artesania tipico di Aruba. Ban hisa e bandera y demostra cu orguyo, e orguyo cu nos ta sinti cu e pais aki a conoce un gran persona manera Betico Croes" Prome Minister a expresa.