Delegacion di Sint Maarten ta na Aruba pa explora maneho di desperdicio

Den e contexto aki, un delegacion di Sint Maarten ta na Aruba, lidera pa Minister di Vivienda Publico, Medio Ambiente y Infrastructura, Sr. Patrice Gumbs.  E delegacion lo conoce mas di cerca e transformacion aki y explora solucionnan cu por ta aplicabel na Sint Maarten.

E ciere di dump Parkietenbos a marca un comienso nobo den maneho di desperdicio di Aruba. Un paso cu mester a tuma hopi aña atras mirando cu e dump tabata operando riba su capacidad pa decadas caba, y extremadamente dañino pa salud publico y medio ambiente.  

Pa logra esaki a implementa diferente strategia clave, entre nan:

• Redireccion di desperdicio pa reduci e cantidad cu tabata yega dump. 
• Impulsa un sector di procesa desperdicio, creando oportunidad pa empresanan di reciclahe y sostenbilidad. 
• Desaroyo di strategianan a largo plaso, basa riba data di pasado y actual. 
• Fortalece e cumplimento y control, incluyendo medida pa duna boet ora tira sushi ilegal, esaki ainda ta den proceso mirando cu ta rekeri cooperacion di husticia.

E problema di maneho iresponsabel di desperdicio ta un desafio di hopi decada na Aruba.  Na 2012, e raport di Cero Tolerancia, a identifica 62 sitio habri, cual 31 tabata uza como dump ilegal. Awe esaki a reduci na 6 sitio. DNM ta monitorea esakinan y e siguiente paso ta pa hunto cu Bureau City Inspector atende cu nan. Esaki ta demostra cu maneho di desperdicio no ta solamente un asunto di infrastructura, sino tambe di un cambio cultural y di comportacion di comunidad.

A pesar di e avancenan, e transicion no a tuma luga sin desafio. Resistencia politico, incluso acto di tira sushi clandestino den anochi, y e implementacion di medidanan di control y cumplimento tabata rekeri un esfuerso considerabel. Sinembargo, a traves di Bureau City Inspector (BCI), esfuersonan a intensifica pa combati e praticanan ilegal aki y reforsa consciencia ambiental den e comunidad. Awe, tin mas control social, reportando actividad ilegal di dump pa proteha nos isla di esnan cu no ta demostra amor pa Aruba. Danki na e vigilancia di e pueblo, instancianan relevante por tuma accion rapido contra e irresponsabilidad di tira desperdicio unda cu ta. Tin varios sitio na unda awendia por hiba desperdicio, esakinan por haya riba limpi.aw

Aruba ta riba e rumbo pa transiciona na un economia circular, promoviendo e principio di reduci, reuza y recicla. E planificacion di un Milieupark (Parke Ambiental) ta den proceso. Aruba for di basta aña tabata merece un centro clave pa procesamento di desperdicio y recuperacion di recurso. Sinembargo, pueblo mester ta consciente cu soluciona un problema di mas cu 70 aña no ta un asunto di paar di aña. E continuidad di e vision lo depende di compromiso di e proximo gobierno pa mantene e mesun boluntad pa sigui avansa cu solucionnan responsabel basa riba data, considerando semper e bienestar di pueblo, planeta y prosperidad.

Ta realisando un estudio den colaboracion cu Universidad di Georgia pa analisa e comportacion di e comunidad den relacion cu maneho di desperdicio. Esaki lo contribui na mehora strategianan implementa, specialmente di separacion di desperdicio.

Riba e caminda pa un Aruba mas limpi, sector publico y priva tin un rol crucial. Ainda tin retonan pa soluciona, como amplia e orario di centronan di procesamento di desperdicio den fin di siman.

E delegacion di Sint Maarten tin e oportunidad pa conoce detayadamente tur e iniciativanan aki y tambe comparti nan conocemento cu e ekipo di Aruba. E intercambio di experiencia no solamente lo fortifica cooperacion entre islanan di Caribe, sino tambe lo permiti pa avansa colectivamente den implementacion di solucionnan sostenibel y responsabel pa maneho di desperdicio den e region.