Cuido Salud Hubenil ta informa riba chekeo general preventivo di salud, desaroyo y bienestar di muchanan na scol.

Esaki ta tuma lugar manera tur aña na diferente scol rond Aruba. 

Chekeo general di Salud 

Ta  haci tur chekeo pa promove y proteha salud y bienestar di muchanan, pa asina mas y mas mucha crece y desaroya saludabel aki na Aruba. E dokternan di Cuido Salud Hubenil ta e mesun cu ta samina y monitor e salud y desaroyo di baby na Wit Gele Kruis y ta sigui den e periodo escolar. Den e periodo escolar e dokternan y enfermeranan di Cuido Salud Hubenil, cu colaboracion di mayornan, scolnan y unda ta necesario lo involucra otro instancianan di cuido, ta haci e chekeo general. 

Nos ta pasa na scol (preparatorio, basico y special) pa ofrece chekeo general di salud na muchanan segun e indicacion di scol, cual lo informa na mayornan. E chekeo ta encera parti salud fisico (e.o. peso, largura, motorico, oido, bista, curason etc.), parti salud social emocional (su sentimentonan, experencianan, amigonan etc.) y tambe informacion di mayor of scol lo por yuda pa cu salud di e mucha. Si ta necesario Cuido Salud Hubenil lo duna conseho of referi e mucha pa asina por ricibi e sosten of ayudo necesario den acuerdo cu su mayornan. 

Seccion Cuido Salud Hubenil 

E cuido preventivo di Seccion Cuido Salud Hubenil ta cuminsa for di infancia y ta sigui te adolescencia. Nos ta haya importante pa tur mucha crece saludabel y proteha den nan desaroyo y bienestar. Pa esaki Seccion Cuido Salud Hubenil ta brinda su aporte, cual ta a base di derechonan di mucha, entre otro: derecho riba un bon cuido di salud, derecho riba enseñansa y tambe derecho riba un nomber y nacionalidad, sin discriminacion y sin exclui niun mucha.  

Formulario cu pregunta

Den cuadro di e chekeonan general preventivo di salud na scol, Seccion Cuido Salud Hubenil ta pidi mayor pa yena un formulario cu lo ricibi na scol y entrega esaki na e docente dentro di dos siman.

Obhecion?

Como meta clave y importante nos tur hunto por aporta na un salud, desaroyo y bienestar sano di tur mucha aki na Aruba. Seccion Cuido Salud Hubenil ta spera cu mayornan saca e maximo probecho di e oportunidad aki. Mayornan ta keda importante y involucra den e chekeo.  Seccion Cuido Hubenil ta sali for di punto di salida cu tur mayor kier un bon salud y bienestar pa nan yiu cual ta den cuadro di derecho di mucha. 

Si mayor/ voogd tin obhecion pa esaki, mester manda esaki den e formulario completamente yena bek pa scol dentro di 2 siman. Den tur caso, cu ta un si of no, nos ta desea di haya e formulario bek. Por fabor yena nomber completo y fecha di nacemento di e yiu. Den caso cu no entrega e formulario, Seccion Cuido Salud Hubenil ta asumi cu mayor/ voogd ta duna permiso pa e saminacionnan medico di su yiu na scol.  

Pregunta?

Si tin cualkier pregunta por contact nos libremente na telefon 522-4200/ 522-4294, via Whatsapp 735-2982 of via email jgz@dvg.aw.