Control contra bendemento di vape na hoben bou di 21 aña
ORANJESTAD – Polis di Bario Santa Cruz, conhuntamente cu Polis di Departamento di Permiso (SBV) y Polis Uniforma a cuminsa cu un campaña di control y conscientisacion pa cu benta di vape.
Mirando e situacion for di control y problema di salud cu e uzo di vape ta causa, Cuerpo Policial (KPA) a dicidi di haci control riguroso rond di Aruba.
E meta principal ta pa conscientisa comerciantenan pa loke ta trata e benta di e producto Vape. E Ley di Tabaco (Landsverordening Beperking Tabaksproducten) ta prohibi e benta di Vape na hobennan menor di 21 aña. Ademas e ta prohibi pa un hoben bao di 21 aña huma Vape.
Como parti di e campaña di prevencion y conscientisacion aki, a invita Departamento di Salud Publico (DVG) y Fundacion Anti Droga Aruba (FADA) pa forma parti di e accion di control aki.
Durante fin di siman a haci control na algun comerciante den districto di Santa Cruz. Polis conhuntamente cu DVG y FADA a bay diferente establecimento y controla, informa y conscientisa e comerciante kico ta e consecuencia pa bende hoben bao di 21 aña Vape.
Cada departamento a tuma e oportunidad pa splica y avisa e comerciante loke ta e parti di boet como tambe a enfatisa e pakico no ta permiti bende na menor bou di 21 aña y cu e hobennan tampoco no por uza Vape.