Contract di trabao (individual y colectivo)

Eherce trabao

E trabao mester ta di balor pa e contrapartido. Ademas, e trahado mester haci e trabao su mes, personalmente. T’asina cu e otro partido ta liber pa haci e trabaonan su mes of pa laga un otro haci’e, pero e ora no tin contract di trabao.

Salario

Salario ta e contraprestacion cu e doño di trabao ta paga pa trabao haci. Salario ta e contraprestacion di doño di trabao. Placa (suma fiho, comision, parti di e ganashi), cuminda, paña pa trabao, producto y uzo di vivienda por ta componente di salario. Ora di paga salario e doño di trabao mester tene cuenta cu e ley tocante sueldo minimo. Pa mas informacion por bay na e subtema salario y salario minimo.

E relacion di trabao

Mester tin un relacion herarkico entre e doño di trabao y e trahado. E doño di trabao mester ta competente pa duna ordo of instruccion comprometedor.

Por cera un contract di trabao tanto verbal como por escrito. Ta preferibel un contract por escrito y no uno verbal. Por lo general e partidonan ora di firma un contract di trabao, lo haci palabracion tocante duracion, caracter di e trabaonan cu mester haci, e funcion cu lo bai ocupa, salario, vakantie, cierto sobresueldonan, etc.

Periodo di prueba

Un clausula di periodo di prueba ta nifica un clausula cu ta bisa cu durante un cierto periodo cada partido ta autorisa pa termina e contract di trabao. Hopi biaha hende ta kere cu e prome dos lunanan ta semper e periodo di prueba. Esaki no ta corecto. Mester acorda un periodo di prueba. Por haci esaki tanto verbalmente como por escrito. E periodo di prueba mester ta igual pa ambos partido. No por stipula e periodo di prueba mas largo cu dos luna. Un periodo di prueba nobo como continuacion riba e periodo di prueba cu a transcuri, por ser acorda solamente, si e periodonan di prueba hunto no surpasa dos luna.

Duracion

Por firma un contract di trabao pa tempo defini of pa tempo indefini. Mester cera e contract di trabao pa tempo defini por escrito y ta den e siguiente casonan solamente por haci esaki:

• trabao extra durante cierto temporada di e aña calendario;
• pa durante ausencia temporario di un trahador fiho;
• pa durante un proyecto describi cu precision;
• pa trabao temporario, iregular.

Si a cera un contract di trabao pa tempo defini sin tene cuenta cu loke ta menciona aki ariba, e Director di Departamento di Labor mester duna su permiso prome cu por termina un contract di trabao asina. Mescos tambe si contract di trabao pa tempo defini sigui otro cu interval (interupcion) di no mas cu sesentiun (61) dia.

Por termina un contract di trabao pa tempo defini prome cu tempo, solamente si cada un di e partido acorda e derecho ey por escrito.

Pues e distincion “tempo defini” of “tempo indefini” ta di importancia pa e moda di termina  e relacion di trabao un banda y pa continuacion di esaki di otro banda.

Recompensa, Pago

E doño di trabao ta obliga di paga e trahado por lo menos e salario minimo. Desde prome di februari 2013 e salario minimo pa luna ta:

•  pa categoria II (personal domestico) Afl. 763,55;
•  pa categoria I (tur demas sector) Afl. 1.636.70.

Ta determina e sueldo minimo pa siman door di dividi e sumanan menciona, pa 4,33. Ta calcula e sueldo minimo pa ora door di dividi e salario minimo semanal, pa e cantidad di ora traha pa siman. Por ahusta e sumanan menciona.

Mester paga e salario determina for di e momento cu e trahado a drenta den servicio te na fin di e contract di trabao y esaki a base di e tempo cu e trahado tabata den servicio.

Sueldo ta e contraprestacion pa e trabao haci. E trahado cu no traha, en principio no tin derecho riba salario. ‘No work, no pay’.

Tin algun excepcion riba e regla cardinal aki:

• Den caso di enfermedad of accidente trahado ta keda cu su derecho riba salario. Si e trahado no por haci su trabao a causa di enfermedad of accidente, e mester ricibi su salario completo durante tempo relativamente cortico (un promedio di seis siman) for di e prome dia. Solamente pa medio di un acuerdo of reglamento por escrito por desvia di esaki;
• Si trahado no por traha a causa di e cumplimento di un obligacion imponi door di ordenansa general, lo cual no por sosode den su tempo liber (por ehempel, inscripcion na Registro Civil, etc.), e mester ricibi na un manera husto, durante tempo cortico (=algun ora) su salario completo;
• Si e trahado no por traha a causa di circunstancia masha particular (por ehempel parto di su esposa, fayecimento y entiero di un di e personanan cu ta biba den e mesun cas of mayor, welo/wela,  yiu, nieto/nieta, ruman) tambe e mester ricibi na un manera husto (=1 of mas dia) su salario completo;
• Si e trahado ta dispuesto pa traha, pero e doño di trabao no ta acepta esey, anto e trahador mester ricibi su sueldo completo.

Terminacion di contract di trabao

Por termina e contract di trabao, entre otro, na e siguiente maneranan:

1. Acuerdo mutuo.
   E partidonan por cumbini pa termina e contract di trabao bao cierto condicion cu consentimento mutuo. Ta recomenda, aunke no ta obligatorio, pa stipula por escrito e ‘consentimento mutuo’. Di e forma aki ta evita asunto cu no ta bon cla pa futuro;

2. Morto di e trahador.
   E contract di trabao entre e doño di trabao y e trahador ta termina cu morto di e trahador. Pero, e contract di trabao no ta termina cu fayecimento di e doño di trabao;
3. Ora e tempo a pasa.
   E contract di trabao pa tempo defini ta termina, asina leu cu no a cumbini algo otro, automaticamente si e termino pa cual a cera esaki a pasa. Esey kiermen cu dunamento di preaviso no ta necesario, a menos cu a cumbini esey. Si a prolonga e contract di trabao di tempo defini silenciosamente of explisitamente, anto mester duna periodo di preaviso pa termin’e;
4. Disolucion door di hues.
   E relacion di trabao por termina tambe pa motibo cu hues riba peticion di un di e dos partidonan, ta disolve e contract di trabao, basa riba motibopisa. E peticionario den hopi caso mester paga daño y perhuicio na e otro partido;
5. Terminacion durante periodo di prueba.
   Durante e periodo di prueba por kibra e contract sin mas, sin cu un persona ta bira responsabel pa daño y perhuicio;
6. Retiro inmediato.
   Tanto e doño di trabao como e trahado por termina e relacion di trabao inmediatamente, debi na un motibo urgente. Retiro mester tuma lugar di inmediato y mester comunica e motibo urgente inmediatamente na e trahado (contrapartido);
7. Preaviso/Kibramento di contract.
   Por termina e contract di trabao mediante kibramento di contract. Aki mester tene cuenta cu e dia di kibramento y e plaso di preaviso. E dia di kibramento (dia di terminacion) ta e dia cu e contract di trabao ta termina como consecuencia di kibramento di e contract (pues no e dia cu e dunamento di preaviso ta tuma lugar). Partidonan por palabra entre nan, sea verbalmente of por escrito, cu nan por duna preaviso pa cualke dia of pa un cierto dia. Si no a palabra nada, anto custumber ta dicta cu mester duna preaviso pa e ultimo dia calendario di un periodo di pago. Si anula e contract por ehempel dia 20 di maart den caso di un periodo di anticipacion (preaviso) di 1 luna, e contrato di trabao lo termina dia 30 di april.

Plaso di preaviso

Ta solamente por escrito por reduci of prolonga e plaso di preaviso, tanto pa e doño di trabao como pa e trahado. Mester menciona cu e plaso di preaviso no mag ta mas largo cu seis luna.

Tin un foyeto na Hulandes, Arbeidsovereenkomst, tocante e topico aki disponibel.