Consul di Colombia di bishita cerca Minister di Cultura
ORANJESTAD - E siman aki Minister di Finansa y Cultura Xiomara Maduro a ricibi bishita di e Consul di Colombia na Aruba sr. Gustavo Serrano Amaya y Auxiliar de Mision Diplomatica sra. Pilar Rojas.
E bishita tabata den cuadro di un intercambio cultural cu Embahada di Colombia na Hulanda tin deseo di tene cu Aruba y Corsou.
Pa Aruba e deseo ta pa yega na un intercambio cultural cu Tumaco cu ta keda na e region Pacifico di Colombia. E intercambio lo consisti di tres actividad, un intercambio di baile entre hobennan di Tumaco y Aruba, un charla riba turismo sostenibel y un tayer di gastronomia pa hobennan por cera conoci cu e arte culinario di Tumaco. E intencion ta pa e intercambio cultural aki por tuma luga fin di october proximo.
E intercambio cultural entre Aruba y Colombia ta yuda estrecha e lasonan di hermandad cu ta existi entre e dos paisnan y tambe di Colombia cu Reino Hulandes.
