Conseho di Minister hunto cu personal di Bestuurskntoor a despedi di sr. Henny Eman

Riba e mainta aki famia y amistadnan a pasa Bestuurskantoor na unda cu Conseho di Minister y personal di Bestuurskantoor tabata para pafo pa duna un ultimo honor, rindi respet y despedi di sr. Eman cu tabata e Prome Minister President di Aruba.

Riba e mainta aki, Vice Premier Xiomara Maduro a hiba palabra den nomber di Prome Minister Evelyn Wever-Croes dunando un splicacion corto riba e biografia di Jan Hendrik Albert "Henny" Eman. Minister Maduro a splica cu Henny Eman tabata un persona importante den e historia politico y desaroyo di Pais Aruba. Como ex Prome Minister sr. Eman a goberna Aruba den 2 oportunidad entre 1986 pa 1989 y entre 1994 pa 2001. Henny Eman a fayece na edad di 76 aña. Su trabou, contribucion y legado lo keda semper como un parti importante den historia di Pais Aruba. Minister Xiomara Maduro a duna condolencia y desea famia, amistadnan, y partido AVP hopi forza cu e perdida di nan ser keri.

Prome Minister ta lamenta e hecho di no por tabata presente na e entiero, y ta manda palabra di profundo condolencia na su famia, y su sernan keri cu e partida fisico di e ex mandatario.