Conferencia "Kibrando e silencio di violencia contra hende muhe"

Na 1977, Nacionnan Uni a reconoce oficialmente e fecha aki como Dia Internacional di Hende Muhe, despues di varios decada di lucha pa derecho di hende muhe, cu a cuminsa desde 1909. E fecha aki ta duna e oportunidad pa admira y celebra tur esfuerso cu hende muhe a tuma pa elimina tur forma di desigualdad di genero rond di mundo.

Den cuadro di e dia special aki, e Facultad di Ley na Universidad di Aruba hunto cu CEDEHM,
FCVR y HIAS, ta organisa un conferencia riba topico di violencia contra hende muhe cu lo tuma luga dia 6 di maart 2024 pa 9or di mainta den Aula di Universidad di Aruba. Pa participa por registra via e link aki:
https://docs.google.com/forms/d/e/1FAIpQLScyz-pWru6OVz-71ic9-9Tjb11NohjxiWmlIk7d-R-nm0N1yA/viewform 

Datonan saca di varios estudio ta mustra cu violencia basa riba genero, incluyendo violencia contra hende muhe y mucha muhe, ta tuma luga na Aruba tambe.
Violencia contra hende muhe ta inclui cualkier acto cu ta resulta of cu mas sigur lo resulta den un
daño fisico y/of daño mental. Violencia contra hende muhe por tuma luga den diferente manera. Esaki por ta den un forma personal, por ehempel den caso di violencia domestico haci door di famia mes of maltrato contra un pareha. Violencia tambe por tuma luga den forma di discriminacion institucional of structural.

Nacionnan Uni ta describi e forma aki di violencia como ‘cualkier forma di desigualdad
structural of discriminacion institucional cu ta laga e hende muhe den un posicion dependiente,
sea fisicamente of mentalmente, na otro hende den su famia, su cas of su comunidad’.
Ehempelnan di esaki por ta custumbernan of tradicionnan religioso of cultural cu ta trece daño na
hende muhe. Un otro ehempel por ta leynan cu ta preveni of nenga un hende muhe acceso igual
na recurso necesario of oportunidadnan pa trabou. E consecuencianan pa victimanan di violencia
contra hende muhe ta profundo. Esaki ta impacta no solamente nan salud fisicamente pero tambe
nan salud mental. Ademas nan ta sufri riba tereno financiero y social. Violencia contra hende
muhe ta representa un violacion evidente di e derechonan fundamental di un ser humano.

Ta rekeri accion urgente pa elimina e forma aki di violencia.
E conferencia aki kier trece hende muhe y hende homber hunto pa asina papia tocante e topico di violencia contra hende muhe y mucha muhe na Aruba. Den e conferencia lo discuti varios topico manera e formanan, e scenario y e causanan di violencia, den e perspectiva di e leynan di derechonan humano combina cu e contexto local. Lo discuti e retonan dificil cu ta encontra na Aruba ora ta papia di violencia contra hende muhe. Tambe, lo pone enfasis riba diferente factornan vulnerabel cu hende muhe ta experiencia abase di nan nacionalidad, edad y status legal.

Violencia contra hende muhe no ta un problema cu solamente ta afecta hende muhe. E ta un problema social cu tin su retonan pa famianan, comunidad y henter e pueblo di Aruba. Violencia contra hende muhe ta un crimen, un forma di discriminacion y un violacion di un persona su derechonan fundamental. No tin hustificacion pa sigui permiti e victimanan sufri e inhusticia aki den silencio pa motibo di berguensa of miedo. Ban kibra e silencio di violencia contra hende muhe y hunto cuminsa traha riba solucionnan cu por yuda forma un comunidad na Aruba cu ta igual.

Invitacion Conferencia "Kibrando e silencio di violencia contra hende muhe"