Competencia escolar di fotografia y baile, Aruba orguyo di nos tur
ORANJESTAD - Tur aña Ministerio di Cultura ta organisa actividadnan escolar colectivo relaciona cu Dianan Nacional, pa inculca e sentimento patriotico den e muchanan.
Ademas ta distribui material ilustrativo, y educativo riba e historia y realisacion di nos Himno y Bandera pa scol preparatorio y basico.
Pa e aña aki Ministerio di Cultura y CCDN ta organisa un competencia escolar di fotografia y
baile pa tur scol preparatorio y basico. Ta invita e scolnan preparatorio y basico pa participa den e competencia aki y demostra talento y creatividad di e alumnonan pa gana premio pa nan klas.
Competencia Escolar di Fotografia
Pa participa e alumno mester saca un potret di loke ta laga nan sinti orguyoso di Aruba y hunto cu e potret ta manda un texto cortico, splicando dicon e potret ta laga e alumno sinti orguyoso.
Por saca potret cu telefon celular of camera pero e potret mester ta saca horizontal y na final e scol lo scoge e miho potret pa entrega na Comision Celebracion Dianan Nacional via email CCDN@cultura.aw no mas laat cu 14 di maart pa 12'or di merdia. Lo anuncia un ganado pa scol preparatorio y un ganado pa scol basico. E premio ta 350 florin na ‘kadobon’ pa e klas ganado.
Competencia Escolar di Baile
Tur klas di scol basico por manda nan video di baile creativo uzando e audio di e jingle “Aruba, orguyo di nos tur”. Mester graba e video den formato horizontal y manda esaki via email prome cu 14 maart pa 12’or di merdia na CCDN@cultura.aw. E competencia tin dos categoria, klasnan 1-3 y klasnan 4-6. E baile ganado di klasnan 4-6 lo mester presenta e baile di e jingle dia 17
maart riba Plasa Libertador Betico Croes durante e manifestacion cultural. E premio maximo ta 750 florin na ‘kadobon’ pa e klasnan ganado.
Coleccion Aruba
Pa mas informacion di Aruba su Himno y Bandera por bishita e sitio www.coleccion.com. Esaki ta un portal cu e herencia documental y audiovisual di Aruba, na unda tur studiante y Aruba en general lo por haya cantidad di informacion di Aruba y di nos Celebracion di Dia di Himno
y Bandera. Ministerio di Cultura y Comision Celebracion di Dianan Nacional ta haci un cordial invitacion na tur scol, docente y alumno pa haci bon uzo di e portal di informacion aki.
