Colegio Arubano ta anfitrion di Erasmus+ Deplastify The Planet

Ta trata aki di studiantenan di diferente pais di Europa entre otro, Belgica, Croacia,
Austria, Portugal y Spaña cu ta na Aruba pa e colaboracion unico cu Colegio Arubano.
E studiantenan ya caba tin algun luna trahando riba e proyecto aki y tin como meta pa
na final, presenta un buki den cual nan lo enfoca riba e importancia pa baha e uzo di
plastic pa garantisa sostenibilidad.

Plastic ta un problema mundial y na Aruba esaki no ta un excepcion. Hopi sushedad,
incluyendo plastic, ta bin di otro paisnan via lama. Plastic ta un producto cu ta tuma
entre 20 y 500 aña pa decomposita debi cu no tin microorganismo pa degrada esaki.
Plastic ta un reto mundial y motibo pa cual organisacionnan reconoci ta buscando tur
manera pa reduci e impacto cu plastic ta causa na medio ambiente.

Segun Prome Minister, Aruba ta un di e prome paisnan den region cu a elimina e uzo di
‘single use plastics’ y awo ta intensiva e maneho y iniciativanan pa combati esaki aun
mas. Prome Minister a gradici Colegio Arubano pa participa na e proyecto aki mirando
cu esaki ta tuma hopi dedicacion, energia y sacrificio pa logra y ta desea nan hopi exito
e siman aki.

Ademas e mandatario a gradici tur studiante di exterior cu ta participando na e proyecto
aki y ta desea nan tambe hopi exito y ta spera cu nan bay cas cu un bon impresion di
Aruba y e maneho di Gobierno riba e tema di sostenibilidad.