Celebracion di SDG week 2024, ban compromete na un accion

Durante di e siman aki lo tuma luga un campaña pa aumenta conscientisacion riba e Metanan pa Desaroyo Sostenibel (SDG). Nos ta invita tur compania, organisacion non profit, sector publico, y individuo pa uni y contribui na un futuro mas sostenibel pa Aruba. Cambio pa un miho Aruba solamente ta posibel na momento cu nos tur crea un compromiso hunto.

Na cua di e SDG bo lo compromete pa un aña?

Comision Nacional di SDG ta invita cada individuo, compania of organisacion non-profit pa scoge e SDG di nan preferencia y compromete pa traha riba esaki durante di un aña. Por haci esaki door di yena e Pledge Form via di e siguiente link: https://forms.gle/gx7YJfsCRWC9PnQK6 cu ta disponibel riba e Facebook y Instagram di SDG Aruba.

Comparti bo miho practicanan y inspira otro

Ta invita pueblo pa comparti nan miho practicanan y success stories di SDG riba red social y tag SDG Aruba uzando e hashtags #SDGAruba y #SDGWeekAruba2024.
Door di comparti e miho practica y logro riba medionan social nos ta crea un ola di inspiracion pa otro, con pa contribui na e sostenibilidad di nos pais y mundo henter.

Logo y material di SDG na Papiamento

Nos ta encurasha tur compania, organisacion y individuo pa bishita e website di SDG Aruba y download e toolkit pa asina por haci uzo di tur e logonan y tiles traduci na Papiamento y otro idioma. Den caso cu tin pregunta semper por tuma contacto via email na info@sdgaruba.com.

Kico ta SDG of e Metanan Mundial pa Desaroyo Sostenibel?

Hopi biaha ta confundi sostenibilidad cu solamente medio ambiente, con pa combati cambio climatico of cu e tin di haber cu reciclahe unicamente. Pero e 17 Metanan Mundial pa Desaroyo Sostenibel  (SDG) di Nacionnan Uni ta cubri hopi mas! Trahando riba 1 of mas SDG ta yuda mehora e bida pa tur hende, no solamente den e  area di medio ambiente sino tambe bienestar social, prosperidad y paz pa un y tur. E 17 metanan ta interconecta cu otro y ta parti den 5 pilar cu ta fundamental pa logra un futuro sostenibel:

• Hende: ta dirigi pa caba cu pobresa, caba cu hamber, salud y bienestar, enseñansa di calidad, igualdad di genero y garantisa igualdad pa tur hende.
• Planeta: ta enfoca riba e contribucion critico cu nos naturalesa ta duna na bida humano y ta reconoce e estado actual di nos medio ambiente: awa limpi, accion riba clima, bida bou awa, bida riba tera, energia limpi y economico
• Prosperidad: ta enfoca riba garantisa cu tur hende por disfruta di un bida prospero y satisfactorio y cu progreso economico, social y tecnologico ta bay man den man: energia limpi y economico, trabou decente y crecemento economico, innovacion y infrastructura, reduci desigualdad, produccion y consumo responsabel, barionan y comunidadnan sostenibel
• Paz: ta enfatisa riba sociedadnan inclusivo y husto, na unda tin paz, dunando acceso na husticia pa tur hende y construi institucionnan efectivo, responsabel y inclusivo na tur nivel.
• Partnership: ta pidi pa fortalece e formanan di implementacion, construi y mehora asociacion cu diferente stakeholder.

Unicamente door di uni nos por logra un pais mas fuerte, husto, duradero y placentero pa un y tur.