Carnaval
General
Desde comienso di siglo binti ta celebra carnaval na Aruba den februari/maart. Carnaval ta un serie di celebracion/actividad festivo cu ta tuma luga net despues di e cambio di aña.
E prosperidad economico di e añanan trinta a contribui n’e crecemento di actividad social riba e isla. E prome celebracionnan di carnaval na Oranjestad tawata tuma luga den diferente club. Despues a cuminsa subi caya haciendo uzo di vehiculo decora cu rama di palma. Un par di participante disfrasa ta baila tras di e carosanan aki.
Despues cu e inmigrantenan fo’i Trinidad y e otro islanan Britanico di Caribe a establece nan mes na 1930 na Aruba, nan a cuminsa celebra carnaval na San Nicolas manera nan tawata tin custumber di haci esaki na nan pais. E prome parada di carnaval a tuma luga na San Nicolas na 1945. Tawata un grupo di inmigrante procedente di Trinidad y e otro islanan Britanico a tene un parada na honor di e triunfo dje aliadonan. Tres aña despues na augustus 1948 nan a haya permiso pa tene e parada den cayanan di San Nicolas. E biaha ey na honor di 50 aña di gobernacion di reina Wilhelmina. Disfrasa nan tawata baila riba musica di steelband.
Durante transcurso di e añanan tawata celebra carnaval den tur districto riba e isla y ta na 1954 cu a cuminsa centralisa e actividadnan carnavalesco. A lanta Centrale Carnavalscommissie (CCC) y na 1966 a lanta Stichting Arubaans Carnaval (S.A.C.) pa organisa tur evento carnavalesco na Aruba.
Oficialmente e temporada di carnaval ta cuminsa 11 di November pa diesun or di mainta.
Desde e prome siman di januari tin hopi actividad carnavalesco riba e isla. Carnaval ta cuminsa cu e Parada di Flambeu riba e prome diasabra despues di Aña Nobo cu ta inicia e ambiente carnavalesco. E parada masha popular aki ta duna di conoce cu e temporada di carnaval a cuminsa di berdad.
Fecha di Carnaval
E parada grandi di Carnaval cada aña ta cay riba un fecha diferente. E fecha di e parada grandi di Carnaval ta depende di e fecha di Pasco di Resureccion. Pasco di Resureccion ta determina e prome dia di carnaval. Diadomingo di resureccion ta e prome diadomingo despues di e prome luna yen na e comienso di primavera (21 di maart). Ta bay bek cu shete siman of conta cuarenta y shete dia bek, pa stipula e prome dia di Carnaval. Oficialmente Carnaval ta cuminsa riba un diadomingo. Durante e añanan a establece diasabra como un extra dia di fiesta. Como cu Pasco di Resureccion por cay riba 22 di maart y mas tarda 25 di april ta nifica cu ta celebra Carnaval entre e periodo di prome (1) di februari y pa mas tarda 7 di maart. E parada grandi di Carnaval ta cay riba un diadomingo y e celebracion ta sigui te cu diamars, sigui pa Diaranson di Shinishi (e comienso di e cuarenta dia di yuna). Esaki ta un periodo den cual no ta come carni of come dimas. Durante e cuarenta dianan aki e curpa tin tempo pa sanea su mes. Despues di e periodo di yuna ta bini Pasco di Resureccion, fiesta di paz, iluminacion, y resureccion di Hesus for di morto.
E parada grandi
E diadomingo prome cu Diaranson di Shinishi ta e culminacion di Carnaval, e parada Grandi na Oranjestad, cu su disfraznan cu ta hala atencion, bodypiece,
roadpiece y carosa luhoso pasando den e cayanan di Oranjestad y hayando aplauso di e mironesnan. E parada ta cuminsa pa dies or di mainta, encabesa pa e Reina di Carnaval y ta termina ora solo ta baha.
Stichting Arubaans Carnaval (S.A.C.)
E organisacion di evento carnavalesco na Aruba tabata den man di e fundacion, Stichting Arubaans Carnaval (S.A.C.). E fundacion S.A.C. a lanta na aña 1966 riba 11 di november pa diesun or di mainta y a stop di existi na 2014.
Stichting Maneho di Aruba su Carnaval (SMAC)
Entrante november 2014 Stichting Maneho di Aruba su Carnaval (SMAC) a keda lanta y ta encarga cu e organisacion di Carnaval. Tur aña riba 11 di november pa diesun or y diesun minuut e fundacion S.A.C. ta anuncia cu e temporada di carnaval a cuminsa. S.A.C. ta traha e programa p’e actividadnan y ta percura pa tur cos cana bon y sin complicacion. Na final di e temporada di carnaval S.A.C. ta parti premio, entre otro pa e miho grupo, miho road piece, miho body piece, miho carosa y e grupo cu mas ambiente.
Den e programa di Carnaval 2020 por haya tur actividad carnavalesco.
Mirones
E paradanan di Carnaval no ta mescos sin e mironesnan. Miles di persona ta gusta bay wak e participantenan disfrasa, bailando y cantando, tambe nan ta admira e carosanan y nan ta goza di e ambiente, cantando riba e musica duro. Hasta esaki mester ta bon organisa, ya cu e mironesnan presente lo ta para pa basta ora y tur ta prefera di haci esaki den fresco. E ocasion ta un sorto di ‘picnic’ alegre di famia y amistad yena cu ambiente, ya cu nan ta trece nan bebida y comida. Tur hende ta scoge un bon luga canto di caminda pa wak e parada.
E reparticion di e luganan canto di caminda riba e ruta di carnaval durante e ultimo añanan ta cay bou di encargo di Directie Infrastructuur en Planning (DIP). DIP ta encarga pa reparti e luganan (kavel) di un manera husto. Despues di e reparticion e hendenan ta pone sea trailer of tent canto di caminda. Gobierno ta pone tribuna. Mayoria persona ta trata na decora nan trailer y nan ta pone nan stoel, instalacion di musica, y otro corotonan den dje. Algun grupo di mirones ta bisti uniform, sea t-shirt, petchi of sombre.
Durante e paradanan e caminda ta yena di hende alegre y hende cu ta baila riba ritmo di e diferente instalacionnan musical. Esaki ta tuma luga prome cu e parada mes yega. Durante e paradanan e cayanan ta yen di hende cu ta baila y pasa bon. Tanten cu e parada no a cuminsa, e publico ta baila riba musica cu ta sali for di e diferente speakernan banda di caminda.
Figura carnavalesco
Carnaval conoce algun figura y actividad fiho. Momo (e Rey di Carnaval of e Spirito di Carnaval), Prins y Pancho (e prins y e joker), Reinanan y Prinsesnan di Carnaval, Rey of Reina di Caiso y Tumba contest.
Varios eleccion ta tuma luga pa scoge e prinsnan, reinanan, cantantenan y musico/bandanan di carnaval. Por ehempel, Sra.Carnaval, exclusivamente pa e hende muhe di 26 aña bay ariba, y ta eligi e Prins y Pancho (e pareha mas chistoso). Pa e muchanan tambe tin varios eleccion por ehempel e Reina di Carnaval di Mucha/Reina Infantil.
Momo (Kimamento di Momo)
Rey Momo, e Rey/Spirito di Carnaval, ta simbolisa ambiente y locura, y ta representa door di un popchi traha di strooi y bisti cu paña masha colorido. Na final di e actividadnan carnavalesco, e anochi prome cu Diaranson di Shinishi, durante un ceremonia extenso ta kima e Rey Momo. Su kimamento ta simbolisa e fin di Carnaval y e comienso di e 40 dia di yuna.
Musica di Carnaval
Durante e periodo di Carnaval e musica di carnaval ta hopi importante. Na Aruba tin diferente tipo di musica di carnaval.
Tumba
Celebracion di Carnaval a cambia durante e añanan y desde 1971 e festival di Tumba a forma parti di e celebracion. Durante dicho festival ta eligi un Rey di Tumba y pa e hobennan un “Tumberito”. Tumba a cuminsa na Curaçao y su base ta bini di e ritmo di tambu, un ritmo particular, cu e catibonan Africano a trece cu nan na Curaçao den siglo 17. Despues Tumba a profila su mes riba e islanan Aruba y Bonaire. Na Aruba Tumba ta masha popular durante e celebracion di nos dia nacional, dia 18 di maart. Naturalmente ta toca otro musica tambe manera calypso, bachata, merengue, salsa, house y samba.
Caiso
E ta imposibel imagina carnaval sin soca y calypso. Ambos ta un variante di e mesun ritmo, e ta e alma y curason di carnaval. E inmigrantenan di e islanan Britanico den Caribe a introduci e ritmonan ey y cu tempo el a haya su propio caracter local.
Calypso
Calypso tin un ritmo mas slow y su proposito principal ta pa bo expresa bo opinion mediante di canto. E persona ta insinua y conta tur loke a sosode pa medio di canto en bes di haci esaki abiertamente. Calypso a desaroya na final di siglo 18 na Trinidad y despues a introduci’e na Aruba. E topiconan di Calypso ta varia di politica, cosnan social y redo. Pero e proposito principal ta pa reta e publico, sociedad y e otro cantantenan di Calypso.
Den e sentido ey por compara Calypso cu e lucha entre e dos Cabayeronan cu nan spada den Edad Medio, numa den e caso aki ta trata di un lucha pa medio di canto, musica y palabra.
Fuente: Aruba Carnival – Vanja Oduber
Soca
E musica di soca t’esun mas toca durante e paradanan. E ta procedente di Trinidad cu un ritmo mas lihe y di un genero alegre cu teksto y melodia provocativo. Su meta principal ta pa laga e participantenan baila pa ora largo y lanta e mironesnan banda di caminda cu e musica duro. P’esey e ‘Aruba Caiso & Soca Monarch contest’ ta asina importante y cada aña ta eligi un Rey/Reina di Calypso y un Rey/Reina di Soca. Tambe tin un ‘Calypso and Roadmarch’ pa mucha y hoben.
Mighty Talent (Claudius Phillips) ta un artista Arubiano bon conoci y tin varios cancion carnavalesco. El a cuminsa canta di hoben y durante su carera carnavalesco el a gana varios premio. Nan ta yam’e “The King of Kings”. Mientrastanto tin un generacion nobo di musico cu tin cancion carnavalesco nobo y gusta, manera Buleria, Tsunami y N Fusion.
Steelband
Na inicio e steelband tawata forma un parti fiho di e celebracionnan Carnavalesco na Aruba. Nan tawata uza bari di zeta cu ta bashi pa traha e drum. Pa establece e tono mester bati algun sla na e bari. Cada sla ta determina e haltura di e tono ora di tocamento. Durante e ultimo añanan e steelband a perde su posicion central cu e tawata tin den carnaval door di e entrada di e bandanan musical cu ta haci uzo di instalacion musical. Ultimo tempo tin algun steelband cu a bolbe participa den e parada.
Brassband/Asambeho
Esaki ta e bandanan cu ta forma door di tocado di drum y trompetista. Mayoria biaha un brassband ta habri e parada. No tin mucho brassband cu ta participa den e paradanan mas.
Fuente: Aruba Carnival – Vanja Oduber
Grupo di Carnaval
Tin varios organisacion carnavalesco y grupo cu ta participa den e parada. Pa participa den e parada ta tuma varios luna di preparacion. Ta bin cu un tema/topico y di biaha ta cuminsa traha riba esaki. Ta traha varios diseño pa disfraz y bodypiece. Durante e ultimo siman ta traha duro riba e carosanan y disfraznan. Loke ta trata e disfraznan ta haci uzo di material colorido, briyante y decoracion cu ta pone e disfraz briya.
Disfraz
E diseñadornan bon conoci ta traha nan diseño pa cabayero, dama y mucha basa riba e tema/topico di e grupo, por ehempel ‘Indian’ of ‘Avatar’. Djey ta scohe e tela y otro material manera payet, glitter, cralchi, stenchi y pluma cu ta pas cu e tema/topico. Ta haci uzo di material colorido, briyante y decoracion pa asina e disfraznan por briya. Tambe nan ta traha e disfraznan y ‘headpiece’ pa henter un grupo. Tin grupo cu e participante mes tin cu traha su propio disfraz y cada ken ta uza su creatividad.
Carosa
E carosa ta estrena na un manera creativo e tema/topico di e grupo. Mayoria biaha ta e Reina di Carnaval di e grupo ey ta riba e carosa hunto cu algun otro persona y e ta saluda e publico. E bailadonan disfrasa y cu nan ‘bodypiece’ ta sigui e carosa bailando riba musica carnavalesco.
Parada
Tin diferente tipo di parada. Tin entre otro parada di blaas/ballonnenoptocht, parada di scol, parada di mucha y parada di Noord. E parada di ‘Jouvert Morning’ na San Nicolas ta un parada di manifestacion di hopi enthousisasmo di parti di e participantenan bisti cu nan yapon y pidjama. E ta cuminsa cuat’or di mainta y e ta caba ora solo sali. Pues bo mester lanta hopi trempan, p’esey nan ta yam’e ‘pyjama party’.
Un otro parada hopi bon conoci ta e ‘Lighting Parade’. E ta tuma luga riba un diasabra anochi. E participantenan ta bisti nan disfraz di e parada grandi pero ta decora esakinan cu luz. Ta decora e carosanan tambe cu luz y esaki ta duna un bista espectacular. E ultimo grupo di e paradanan ta forma door di bailadonan entusiasma for di den publico. Tur hende cu tin gana di sigui celebra por sigui baila den e grupo aki (last lap). Polis ta esun cu ta dirigi e ultimo grupo menciona aki.
Fuente: Biblioteca Nacional Aruba-Seccion Arubiana