E maneho aproba den Conseho di Minister dia 28 di mei 2024 ta pa yuda mehora siguridad y sostenibilidad den e sector cu ta rekeri permiso di watersport na Aruba.

Na april 2022 a pone un stop temporal riba peticion pa permiso pa eherce actividad acuatico(transporta pasahero contra pago) pa investiga e situacion actual, tanto ambiental como e aspecto di siguridad. Despues di hopi consulta cu varios stakeholder riba e vision di Ministerio di Transporte, incluyendo Directie Scheepvaart, Kustwacht, Maritiem Politie ATA, y AHATA, a bira evidente cu tabata necesario pa haci un revision completo di e ley.

Ademas un estudio riba capacidad di carga y durabilidad di e sector tambe ta importante, pero mirando cu esaki ta tuma hopi tempo, e no ta e intencion pa perhudica e companianan existente y pa e motibo aki ta introduci un maneho temporal mientras e estudio ta keda finalisa.

E watersportbeleid ta enfoca riba tres area principal; reemplaso, expansion y siguridad.  

Reemplaso

• Tur peticion pa permiso nobo ta suspendi te cu proximo aviso;
• lo procesa tur peticion entrega prome cu 1 di januari 2024 pa reemplasa un boto;
• pa reemplaso di boto cu caracteristica similar, Directie Scheepvaart lo realisa e investigacion necesario y ahuste administrativo.

Expansion

• Lo procesa peticion pa expansion entrega prome cu 1 di januari 2024;
• companianan cu ta ofrece tripnan di boto, di pisca, snorkel, y bucea(dive) por cualifica pa amplia nan permiso agregando un boto na nan operacion, si nan ta cumpli cu tur rekisito legal;
• e vergunninghouder, persona cu e permiso ta pertence na dje, mester obtene aansprakelijkheidsverzekering/ liability insurance, di acuerdo cu e articulo 19 Landsbesluit Openbare Wateren en Stranden AB 1987 no. 124; 
• eseguro menciona mester ta entrega na Directie Scheepvaart den tur caso, dus cada bes bo renoba e seguro bo tin cu informa y entrega esaki na DSA.

Siguridad

• For di 1 di januari 2025, tur boto comercial pa actividadnan acuatico mester ta ekipa cu un “propeller guard”;
• pa actividadnan acuatico cu ta involucra transportacion di pasaheronan riba lama (por ehempel, tubing, parasailing), un di dos persona di e compania di deporte acuatico mester ta presente riba e boto pa motibo di siguridad.

Adicionalmente, ta prohibi mara un boto of otro obheto, cu of sin boei na shipwrecks/schip wraken/naufragios por ehempel Antilla, coral of boei cu ta marca zona di landa/buffer.

Pa mas informacion por tira un bista riba e watersportbeleid. Minister di Transporte, Integridad, Naturalesa y Asunto di Adulto Mayor Ursell Arends a informa tambe cu lo tin un sesion informativo cu lo organisa pa comercio den e industria di watersport. Si no ricibi e invitacion por manda un email na naturalesa@gobierno.aw cu specificacion di compania pa añadi esaki den database.

A constata falta di informacion ora ta cumpra un negoshi over di un Eenmanszaak cu un watersportvergunning. No por cumpra un vergunning di un eenmanszaak. Esaki ta conta como un peticion nobo. Tambe si e eenmanszaak cu ta un natuurpersoon cambia pa un rechtspersoon bijv VBA. NV, VBA, tambe ta considera como un peticion nobo. Si por cumpra un Rechtspersoon pero no un natuurlijk persoon

E cambio den maneho ta esencial pa garantisa siguridad y sostenibilidad di e actividadnan acuatico na Aruba. E medidanan aki lo mehora e experiencia tanto pa nos residentenan como pa turistanan y asina mantene un  standard halto di siguridad y proteccion ambiental.