Busca 5 plachi di number

Cada persona priva por busca maximo 5 plachi di number pa cada cita. Por busca bo propio plachinan, pero di famia of amistad tambe. Si ta busca plach’i number pa un otro persona, bo no mester di un carta di apoderacion (machtigingsbrief). Si tin mas cu 5 auto, por traha mas cita.

Companianan por busca maximo 25 plachi di number pa cada cita. Si tin mas auto, por traha mas cita. Companianan por busca e plachinan di nan mes y/of di nan empleadonan.

Pensionadonan cu mester busca plachi di number, tambe mester traha un cita. Personal di Departamento di Impuesto ta yuda e pensionadonan cu nan cita sea via telefon of personalmente na oficina di DIMP na Camacuri.

Confirmacion di cita

Inmediatamente despues di traha e cita, bo lo ricibi un mail cu ta confirma cu bo cita a keda registra. P’esey ta importante pa yena e e-mailadres corectamente. Ta consehabel pa controla bo junk mail tambe pa e mail di confirmacion.

Haci cambio

DIMP ta encurasha tur esnan cu tin un cita haci caba pa busca 5 plachi di number y companianan pa busca 25 plachi di number sea di compania of di nan empleadonan. Esaki lo yuda alivia e tardansa pa reparti e plachinan di number. Pa agrega mas number riba bo cita, djis habri e mail di confirmacion di cita cu a ricibi y click riba "Change/Cancel Appointment" y despues click riba "Edit forms". Ora drenta den e
formulario ta cambia e cantidad di auto y agrega mas number na bo nomber. Corda yena tur e datonan completo. Despues click riba "Update forms" (mas abao) pa sigura cu nos ta ricibi e cambionan cu a haci den e formulario.

Atencion: no ta posibel pa haci cambio mas dentro di 4 dia prome cu fecha di cita.
Si ta busca plachi pa otro persona, please nota e numbernan y trece e lista dia di e cita. Asina ta yuda controla ora di busca e plachinan.
  
Si e cita ta na bo nomber, e ora abo ta e unico persona autorisa cu por busca e plachinan. Ta importante pa e nomber cu a duna ta cuadra cu e paspoort, rijbewijs of cedula. Si pa un of otro motibo bo mes no por busca e plachinan, e ora DIMP por "reply" riba e mail di confirmacion cu a ricibi y pidi pa cambia e nomber. DIMP lo mester e nomber, number di telefon y email di e persona cu lo busca e plachinan di number na bo luga. Pues, bo NO ta perde bo cita. E cita ta keda valido, solamente nos ta registr'e na un otro nomber.

Tuma nota: NO ta posibel pa manda un otro persona busca bo plachinan sin cu a haci cambio di nomber.
  
Upload e documentonan rekeri

Pa cada plach’i number, mester upload e polisa di seguro. DIMP no ta acepta nota di payment schedule, factura di pago of polisa cu a caduca. Si no renoba e seguro, DIMP lo no otorga e plachinan riba dia di e cita.

Ademas mester upload e comprobante di pago di impuesto. Si a paga online, please upload e comprobante di banco. Bo no tin mester e recibo di DIMP prome, pa por haci e cita. Riba dia di e cita DIMP lo duna e recibo di pago.

Haci un cita awe mes via e link:
https://boimpuestoappointments.as.me/licenseplates2025-general