Si kier apela contra e no-tumamento na tempo di un decision ariba un carta di obhecion door di Inspector, por haci esaki dentro di dos aña despues cu e termino di un aña a pasa. E periodo aki ta manera cu ta stipula pa Inspector tuma un decision.

Por entrega e carta di apelacion (beroepschrift), asina cu Inspector keda sin tuma un decision na tempo. Si ta apela pasobra Inspector no a tuma un decision na tempo, e ora ey e Corte por pidi Inspector pa ainda tuma un decision ariba e carta di obhecion. Ademas e Corte por stipula cu loke ta para den Capitulo VII di ‘Algemene landsverordening Belastingen’ ta conta igual durante e termino cu Corte lo stipula.

Den caso cu intencionalmente no a haci declaracion di impuesto, no a haci e declaracion obligatorio, no a cumpli of no a cumpli completamente cu e obligacion stipula den articulo 45 te cu 52 di ‘Algemene landsverordening Belastingen’; ta rechasa e apelacion, a menos cu resulta cu e decision di Inspector no tabata corecto.

Un restitucion di retencion riba impuesto of un restitucion di impuesto paga hunto cu declaracion di impuesto cu ta consecuencia di un decision di Inspector, lo bay p’esun cu a entrega un carta di obhecion. Den caso cu tanto esun cu tin e obligacion pa retene placa di impuesto como esun di cual a retene, a base di mesun hechonan a entrega un carta di obhecion, ta haci e retribucion na esun cu a retene for di dje. Mesun cos ta conta pa un decision tuma door di Corte relaciona cu retribucion di retencion di impuesto.

Procedura di apelacion impuesto

Ta inicia un apelacion na Corte di apelacion pa asunto di impuesto door di entrega personalmente un carta di apelacion dirigi na secretario di  Corte (pa cual griffier di Corte Comun di Husticia di Antiya Hulandes y Aruba ta actua). Of por manda e carta sigura tambe.

E carta di apelacion mester ta argumenta. Un carta di apelacion por contene mas cu un decision. Den caso cu ta apela un of mas decision, mester entrega un copia di e decision(nan) hunto cu e carta di apelacion.

Corte di Apelacion ta manda cada carta di apelacion, dentro di un siman despues di a ricibi nan for di secretario, pa e Inspector contra kende ta apela su cobransa (aanslag), decision of stipulacion.

Corte di Apelacion ta reuni na e lugar y na e ora cu presidente ta stipula. Reunionnan no ta publico y Corte ta dicidi pa medio di mayoria di voto. Si tin dos diferente pensamento lo dicidi e ora ey pa e pensamento cu ta cuadra mas cu mayoria.

Esun cu ta apela por laga un apoderado represent’e. Corte por nenga e representacion door di cierto apoderado. E presidente di Corte tin derecho pa exigi cu e apoderado ta acompaña esun cu ta apela. Tanto esun cu ta apela y su apoderado como Inspector of e empleado publico cu e inspector a apunta, por laga un experto asisti nan. E presidente ta suspende of ta hala e tratamento di e caso pa un otro fecha, si ta necesario.

Corte di Apelacion tin competencia pa yama partidonan hunto pa duna informacion como pa busca informacion por escrito cerca esun cu ta apela. Corte por consulta experto y interprete of e por laga nan wak den buki of otro documento p’e.

E decision di Corte di Apelacion ta argumenta. Ta menciona ken(denan) y riba ki dia a tuma e decision. E presidente di Corte di Apelacion y secretario ta firma e decision. Si presidente no por firma e decision, un otro miembro di Corte di Apelacion cu a atende e caso lo haci’e. Si e secretario no por firma e decision, lo menciona esaki den e decision. Secretario lo manda un copia di e decision pa post sigura na mesun tempo pa esun cu a apela y pa e Inspector. Tambe secretario ta manda e documentonan bek pa esun cu tin derecho ariba nan.