Ban comparti simiya
ORANJESTAD – Departamento di Agricultura, Cria y Pesca (Santa Rosa) ta pidi cooperacion di comunidad, specialmente nan "Amigonan di Santa Rosa" pa yuda cu simiya di fruta of berdura cu nan por tin.
Santa Rosa tin un programa di plantacion hunto cu Scol pa Ofishi, caminda cu nan ta ofrece pochi, gordura y tur tipo di simiya pa e muchanan por uza como material di les di horticultura. Despues cu e matanan crece, nan ta bolbe bek Santa Rosa pa bend’e cu comunidad. E ta aporta cu menos importacion di mata di fruta di afo, pues menos carbon footprint y ta stimula nos hobennan pa contribui den un forma activo na sostenibilidad den Agricultura.
Deseo di Santa Rosa ta pa tin nan propio banco di simiya, pa cual motibo nos ta boga regularmente riba e importancia pa colecta y warda simiyanan natural pa por planta despues.
Esnan cu ta desea di contribui cu simiya di fruta y berdura, por entrega esakinan cerca Sra. Carola Geerman of yama na 5858102 pa mas informacion. Santa Rosa ta gradici comunidad pa contribui na nan banco di simiya.
