Baki den Bario 30 di november 2024 na Marlboro Ballpark na Dakota

Tur luna ta organisa e actividad di Baki den Bario den diferente districto y hunto cu mas cu partners cu ta colabora cu otro, ta provee comunidad un parke di separacion di desperdicio unda por deshaci di ocho diferente tipo di desperdicio. 

Baki den Bario ta un iniciativa di e campaña nacional 'Limpi Limpi' pa conscientisa e poblacion riba e importancia pa procesa desperdicio debidamente. Separacion di desperdicio ta yuda haci e proceso di reciclahe mas eficiente y ta reduci polucion di nos medio ambiente.

Bureau City Inspector lo t'ey pa yuda informa riba e tipo di desperdicio acepta, educa riba e manera corecto pa hiba esakinan na e bakinan y percura cu e evento cana na manera ordena. E helpdesk di Serlimar tambe tabata t'ey durante tur Baki den Bario pa yuda nan clientenan.

Ta importante pa reduci e cantidad di desperdicio cu nos como isla ta produci, y un manera pa logra esaki ta pa reuza mas hopi  posibel. Fundacion Pa Nos Comunidad lo tey presente y lo acepta articulonan den bon estado cu por haya un doño nobo. Articulonan acepta ta, entre otro, muebles, paña y co’i hunga. Pa temporada di pasco FPNC ta colectando diferente producto di cuminda pa traha macuto di comestibel y yuda famianan den necesidad. Pa mas informacion por bishita nan pagina di Facebook, via nan website of puntra y haci bo donacion personalmente cerca nan durante Baki den Bario.

Ta recorda comunidad cu absolutamente no ta acepta asbesto. Pone atencion cu ora haci uzo di e bakinan, e truck mester por tapa e baki cu e net pa e por cambi'e pa uno bashi pa mas hende por sigui tira. Pa percura cu e fluho di rotacion bay miho ta pidi comunidad pa no yena e bakinan unda e no por tap’e cu net. Esaki ta ocasiona cu lo mester warda mas ainda pa pone e baki bashi. 

Pa mas informacion di e maneho di desperdicio, por bishita www.limpi.aw.