Autor y ilustrado di buki pa mucha Mylo Freeman ta bishita Aruba

Mylo ta logra capta e atencion di mucha cu su bunita ilustracionnan y uzo di color, mientras cu e ta duna demostracion, workshop y ta bishita diferente crèche riba e isla.

E coleccion di buki cu Biblioteca tin di Mylo Freeman (Teksto y/of Ilustracionnan) ta: Prinses Arabella na e Museo, Morocho!, Prinses Arabella ta bai Pelukeria, Prinses Arabella su Cumpleaño, Prinses Arabella y Sinterklaas, Prinses Arabella ta Bay Scol, Prinses Arabella y e Bolo Grandi, Prinses Arabella y Omi, Na Mesa cu Zaza, Prinses Arabella su Bestia Chikito, Grandi, Bunita y Spanta, Prinses Arabella y e Babysitter, Prinses Arabella y Prins Mimoen, Bo Color, Mi Color, Prinses Arabella ta Haya un Webo, Prinses Arabella ta Crea Color, Zaza ta Celebra, Zaza ta Bai Drumi, Rumannan!, E Barbuletnan di Prinses Ling, Orguyoso di su Cabey!, E Rugido di Leon, Potje! Esakinan tur ta bukinan cu por presta na Biblioteca Nacional.

Mylo a cuminsa su carera cu e buki Potje! (publica pa Gottmer na 1997), cu Mylo a skirbi ora cu su yiu no tabata kier sinta riba pochi. A traves di e storia, Mylo a trata di convence su yiu David cu e pochi tabata special pe. A publica Potje! na 5 idioma: Hulandes, Ingles, Danes, Hebreu, y Koreano.

Mylo ta duna atencion special na e autoestima di muchanan di color na Hulanda via e historia di Prinses Arabella y su amigonan. Tin pochinan traha segun e personahenan di e storia, cu Mylo lo trece esakinan den su presentacionnan. Pa mas informacion tocante e autor, por bishita www.mylofreeman.com.