Ta trata aki di vuelonan non-stop cu Boeing 737-8 MAX cu un capacidad di 176 stoel, saliendo for di Sao Paulo, Brasil pa 3:30 pm y cu ta yega Aruba pa 9:00 pm.

GOL ta bira e di 28 aerolinea cu ta bulando pa Aruba. E mercado Latino Americano ta sigui crece y ta yega na 32 vuelo semanal pa Aruba. Esey ta traduci den un incremento cuantioso den cantidad di stoel disponibel di e mercado di mas importante. Latino America ta figura e cuater hubnan di mas importante di e continente, cu ta Bogota, Panama, Lima y Sao Paulo.

Avianca ta keda e aerolinea cu ta trece mas turista di Latino America cu 15 vuelo semanal pa Aruba. Copa Airlines cu ta bula 10 biaha pa siman for di Panama, mientras Latam Airlines ta bula cuater biaha pa siman for di Lima, Peru pa Aruba. Entante december Gol lo bula tres biaha pa siman for di Sao Paulo pa Aruba.

Gol ta forma parti di Grupo ABRA, cu ta un grupo di transporte aereo lider den e continente Latino Americano. E tin e structura di un “Holding Company” forma pa un acuerdo entre e doñonan di Avianca y GOL. Aunke cada compania ta sigui opera independientemente di otro y cu nan mesun marca, toch nan ta traha hunto den code-sharing, den cumpramento di avion, comparti experiencia y percura pa esun complementa e otro.

Riba e dianan cu GOL no ta bula for di Aruba, por cumpra un pasashi cu Avianca y toch yega Sao Paulo uzando e mesun avionnan di GOL for di Bogota pa Brasil. E facilidad cu e acuerdo aki ta bin cu ne ta encera cu bo por check-in di Aruba y bo ta haya boarding pass te na bo destino final y bo maletanan tambe ta sigui nan rumbo sin cu mester tuma nan na Bogota.

Despues di pandemia, cu scarsedad di avion y personal di cabina, e aerolineanan a bira hopi estricto. Asina cu un mercado no ta “perform”, mesora ta baha vuelo of hasta cancela vuelo. Cu Aruba ta hayando ruta nobo y mas vuelo ta bisa hopi di nos destinacion, cu ta sigui halto den demanda.