ATA y Qredits ta firma acuerdo y extende e Aruba Signature Experience te cu 2027

E colaboracion aki ta reafirma e compromiso pa sigui duna sosten na negoshinan nobo y empresarionan local, mientras cu ta sigui desaroya turismo niche. 

Aruba Signature Experience ta un programa cu a cuminsa na aña 2021, net despues di e pandemia, como un iniciativa conhunto di ATA y Qredits Aruba pa yuda empresarionan local of negoshinan nobo y pa desaroya y promove experencianan unico y di balor halto pa e bishitantenan di nos isla.  

Durante e ultimo 3 añanan, e programa a yuda negoshinan chikito y nobo drenta den e industria turistico exitosamente, door di duna nan e guia y sosten necesario, mientras ta enrikece e experencia di e bishitantenan cu actividadnan of servicionan autentico. E 11 ganadonan di Aruba Signature Experience a logra introduci servicio y experencianan unico y imersivo cu ta pone enfasis riba nos patrimonio cultural, nos naturalesa, y tambe den e area di bienestar y romance.  

E aña aki, e acuerdo ta inclui un ampliacion importante: e programa lo no ta habri solamente pa negoshinan cu ta ofrece experencianan of servicionan unico, sino tambe pa artesanonan local. E expansion aki ta alinea cu e vision di ATA pa promove turismo cultural y duna sosten na nos artesanonan y empresarionan creativo. 

Tin dos manera cu empresarionan y artesanonan por bin na remarca pa e Aruba Signature Experience: 

• Por aplica pa participa na e Small Business Academy di Qredits Aruba caminda durante un periodo di 10 siman largo, participantenan lo ricibi guia structura y intensivo pa asisti nan den e proceso di lanta un negoshi. Esaki tin un costo di Afl. 350,-.  
• Negoshinan cu aplica pa financiamento directamente cu Qredits Aruba por bin na remarca pa forma parti di e Aruba Signature Experience a basa di un proceso di seleccion. Primordial ta cu e idea of negoshi mester ta enfoca riba eco-turismo, turismo cultural, romanticismo of bienestar personal.  

Na final di e programa, Aruba Signature Experience lo scoge un maximo di cinco ganado cu lo ricibi sosten completo di ATA y Qredits Aruba cu ta inclui sosten financiero, asistencia cu mercadeo y branding, y coaching pa desaroyo strategico di e negoshi. Interesadonan por registra no mas tarda cu 1 di mei 2025 pa e Small Business Academy cu lo cuminsa dia 7 di mei venidero.  

Ronella Croes di ATA, ta orguyoso di por sigui cu e colaboracion aki cu Qredits Aruba, expandiendo e oportunidadnan pa nos artesanonan y empresarionan local y fortaleciendo Aruba su posicion como un destinacion conoci pa su experencianan unico.  

Nathaly Harms, Branch Representative di Qredits Aruba a enfatisa cu Qredits Aruba ta dedica na duna sosten na negoshinan chikito, empresarionan nobo y start-ups y ta percura pa duna e hermentanan necesario pa logra exito.  
E partnership aki cu ATA ta importante, pasobra e lo duna mas empresario y artesano e oportunidad pa transforma nan vision den realidad, beneficiando tanto e economia local como tambe turismo di Aruba.  
Pa mas informacion di e programa "Aruba Signature Experience" y con por aplica, por bishita  www.aruba.com/registra.