A.T.A. ta presenta e di dos edicion di Voices of Tourism cu orador internacional Trent Shelton
ORANJESTAD - Aruba Tourism Authority (A.T.A) den luna di november pa medio di “Voices of Tourism,” a organiza un conferencia diseña pa cultiva interes, compromiso, y pasion cerca studiantenan den e ramo di hospitalidad y otro areanan; e bos di e presente y futuro di nos turismo.
E programa ta enfoca riba studiantenan di E.P.B., E.P.I., y algun studiante di Universidad di Aruba, kendenan ta representa e gran parti di forsa laboral y e futuro lidernan di e industria di turismo na Aruba.
Mirando e exito di e conferencia di aña pasa, a dicidi di bolbe invita orador internacional y inspirativo Trent Shelton, pa asina un biaha mas conecta cu nos hobenan durante dos mainta di conferencia den Renaissance Convention Center. Trent a guia e audiencia na con pa yega na nan proposito, nan poder, y nan paz interno. Su mision di bida ta pa conecta e hende cu e mihor version di nan mes, comunicando directamente di su experiencia propio. Cu su plataforma global, Trent ta conecta cu su audiencia via diferente charla inspirativo, podcast, buki y audiobook, rednan social, cursonan di salud mental y maneho di bo mente pa menciona algun.
E conferencia di e aña aki, titula ‘It All Starts With You’, a empodera y ekipa e studiantenan pa asina nan por refleha riba nan proposito, crecemento, y potencial personal. Durante di e conferencia, algun studiante a ricibi e buki ‘Protect Your Peace: Nine Unapologetic Principles for Thriving in a Chaotic World’ scirbi pa e propio orador Trent Shelton y T-shirts di ‘It All Starts With You’.
E conferencia a conta tambe cu palabranan di Ronella Croes, CEO di A.T.A. kende tambe a comparti su motivacion personal y profesional.
A.T.A. ta gradici tur esnan cu a contribui na e programa, incluyendo studiantenan, docentenan, ekipo di A.T.A., y e ekipo di Trent Shelton.