ATA ta gradici pa e reconocemento otorga door di Minister President den cuadro di 5 aña di COVID 19

E comision aki ta consisti di señor Rino Hermans di Bureau Rampenbestrijding Aruba, señora Ronella Croes di Aruba Tourism Authority, señora Sharline Koolman cu ta consehero di Ministerio Social, y señora Vanessa Kock cu ta encarga cu e landenpakket y cu siguridad di frontera.

ATA ta gradici pa e reconocemento otorga door di Minister President.  

E siman aki ta exactamente cinco aña cu a transcuri caba, despues cu economia mundial a paralisa pa motibo di un virus cu a cuminsa na China pero cu a contagia henter mundo. Awe cu tur cos ta normalisa, ta bon pa para un rato keto y realisa cuanto esfuerso a hinca como pais, pa por a surpasa e momentonan ey. No tabata facil, pasobra mientras cu tabata enfoca riba aspectonan ecomomico, tabatin un menasa serio di salud, cual a costa bida di varios ciudadano. Cu e dolor y tristesa aki, tur hende mester a sigui lucha y percura pa mantene mas tanto hende salud, mientras cu mester a convence mundo cu Aruba ta cla pa nan regresa.

Tabata na fin di aña 2019 caba a cuminsa monitorea e virus di China. Na januari y februari 2020, ATA a produci un analisis di kico por ta e impacto di e virus aki riba nos turismo. Dia 8 di maart 2020, Crisis Management Office (CMO) a yama CEO di ATA Ronella Croes pa presenta mesora. E dia ey a detecta e prome persona cu a drenta Aruba for di China cu tabata un area di risico.

Diabierna dia 13 di maart 2020 a cera frontera di Aruba y a keda isola di mundo. Bida a sigui y mester a atende aspectonan vital, manera e cantidad Rubiano cu a keda pega den exterior. Di otro banda, un otro ekipo a cuminsa prepara nos reapertura. No tabatin tempo di perde, pasobra Aruba ta depende di turismo.

ATA a activa mesora

Esey tabata momento cu ATA mester a cambia e strategia di comunicacion di Aruba y a cuminsa uza “We are open for Happiness”. A defini mesora cu e reapertura di frontera lo ta den tres luna di tempo. A cuminsa habri frontera fin di juni y pa Merca a habri 10 di juli, sigui pa Latino America y despues Europa.

Aruba a sobresali y a gana premio internacional pa ‘maneho efectivo y plan di recuperacion di nos destinacion despues di cera frontera’, ‘implementacion di e Plataforma digital di inmigracion’, ‘introduccion di un seguro special di Covid pa nos bishitantenan’ y pa e ‘colaboracion entre sector publico y priva pa recuperacion di turismo’.

Mientras cu henter mundo tabatin miedo di habri frontera pa e riesgo eminente cu e virus aki ta trece cu ne, nos a opta pa habri toch y mantene e isla bou control. No tabata facil y Gobierno di Aruba e demostra confiansa den e profesionalnan cu a conseha cu tabata OK pa habri numa, mientras cu mayoria entidad internacional a desconseha. Despues di reapertura di frontera di juli te december 2020, e promedio di yegada pa tur bishitante, a baha cu 74% pa henter 2020.

Pero, cu determinacion y trabou den ekipo, nos a mira un recuperacion lento pero stabiel, cu den 2021 e promedio di caida tabata -28%. Na 2022, mientras ainda a experencia un caida total di -2%, por a mira un recuperacion total desde april 2022 te cu awe. Comparando 2023 y 2024 cu 2019, ta nota un aumento di 13% y 27%.

Mientrastanto a stop di compara 2024 cu 2019, mirando cu na 2023 ya caba a registra un recuperacion total. Comparando 2024 cu 2023, Aruba a experencia un aumento di 12.8% den yegada. A pesar di e pandemia di COVID-19, e Guest Experience Index di Aruba a keda stabiel rond di 9.1, indicando un grado halto di satisfaccion di e huespednan desde juli 2020 te december 2024.