Prome Minister ta indica cu e acuerdo aki tin beneficio pa Pais Aruba, mirando cu e interes riba e debe di COVID-19 ta baha inmediatamente di 6.9% pa 5.1%, y lo trece 16 miyon florin adicional den e caha di gobierno. E placa aki, Gobierno lo inverti den proyectonan importante.

Awor cu e acuerdo ta firma lo sigui pa e siguiente fase, cu ta pa negocia con pa yega na un Rijkswet. Ainda tin 3 punto pa negocia riba dje: e prome ta e normanan exacto, di cual IMF lo ta e consehero pa Aruba y Hulanda. E di dos ta pa defini e "exit bepaling", pa asina tin un indicacion na ki momento gobierno por sali di e Rijkswet. Y ultimo ta pa negocia kico lo ta e areglo financiero cu Hulanda ta dispuesto pa duna Aruba, riba e debe bieu.

Si logra yega na e Rijkswet prome cu mei 2025, e ora e interes lo baha na 3.4%, cu lo trece mas beneficio pa Aruba.